Россия «COVID-19»га қарши вакцинани муҳтож мамлакатларга экспорт қилишга тайёр — Сергей Лавров
Фото: РИА Новости
Россия «COVID-19»га қарши вакцинани муҳтож мамлакатларга экспорт қилишга тайёр. Бу ҳақда Россия ташқи ишлар вазири Сергей Лавровга таяниб, Покистоннинг «News International» нашри хабар бермоқда.
Шу билан бирга, ТИВ раҳбари давлатнинг устувор вазифаси ўз аҳолисини эмлаш эканлигини таъкидлаган.
«Албатта, «COVID-19»га қарши дори-дармонларни тенг тақсимлаш масаласи, айниқса, қашшоқ мамлакатлар учун жуда муҳим аҳамиятга эга. Шу боис биз Россиянинг хавфсиз ва самарали вакциналарини шаффоф тарзда етказиб беришга тайёрмиз», деган Лавров.
ТИВ раҳбари ушбу йўналишда жуда кўп ишлар қилинаётганини айтган. Шунингдек, у Россиянинг «Спутник V» вакцинасини етказиб бериш бўйича 50 дан ортиқ мамлакат билан шартномалар тузилганини қайд этган. Унга кўра, баъзи мамлакатларда вакцина ишлаб чиқариш ҳам йўлга қўйилган.
Россия дунёдаги биринчи давлат бўлиб, «CОVID-19»га қарши вакцина («Спутник V»)ни рўйхатдан ўтказган эди.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг