Иллюстратив фото

Жорий йилнинг 15 апрель куни Адлия вазирлиги ягона QR-кодлар бўйича идоравий ҳужжатни давлат рўйхатидан ўтказди (рўйхат рақами 3817).

Қайд этилишича, мазкур ҳужжат Президентининг 2025 йил 10 декабрдаги ПФ–246-сон фармони ижросини таъминлаш мақсадида қабул қилинган. Давлатимиз раҳбарининг ушбу Фармон билан барча савдо ва хизмат кўрсатиш соҳасидаги юридик шахслар учун босқичма-босқич ягона QR-код орқали тўловларни қабул қилиш тизими жорий этилиши белгиланган.

Унга кўра, QR-код орқали тўловларни амалга оширишнинг ягона тартиби ҳамда ягона QR-код тизими иштирокчиларининг вазифалари белгиланди. Ягона QR-код – фойдаланувчиларга исталган банк ёки тўлов ташкилотининг мобил иловаси орқали тўловларни амалга ошириш имконини беради.

Мазкур қоидалар қуйидагиларни назарда тутади:

• QR-кодлар статик ва динамик турларга ажратилади;

• барча тўлов тизимларининг ягона QR-код тизими орқали ўзаро интеграцияси таъминланади;

• QR-код тизими оператори томонидан тўловлар ҳақидаги маълумот ва ҳисоб-китоблар автоматлаштирилган тарзда амалга оширилади ва реал вақт режимида QR-код тизими иштирокчиларига етказилади;

• QR-код тизими доирасида мижозларни қўллаб-қувватлаш хизмати ва мурожаатларнинг ҳолати тўғрисидаги маълумотларни юклаб олиш имконияти яратилади.

Қоидаларга кўра, ҳар бир фойдаланувчига мобил иловалар орқали QR-кодни сканерлаш, тўлов суммасини тасдиқлаш ва ҳар бир операция бўйича онлайн маълумотнома олиш ва транзакциялар тарихи билан танишиш имконияти тақдим этилади.