Фото: РИА Новости

Россия “Крокус Сити Холл” концерт залидаги терактга буюртма берганларга албатта етиб боради. Бу фикрларни Россия президенти Владимир Путин Ички ишлар вазирлиги коллегиясининг кенгайтирилган йиғилишида айтиб ўтди.

Президентнинг сўзларига кўра, ҳуқуқ-тартибот идоралари нафақат бевосита жиноятчиларни, балки терактнинг занжиридаги барча бўғинлари ва якуний фойда олувчиларни ҳам аниқлаши керак.

«Ҳамма нарсани сотиш ҳам осон: ҳар қандай маълумотни сотиб олиш ва сотиш мумкин, шунинг учун биз якуний харидорларга албатта етиб борамиз», дея ишонтирди Россия раҳбари.

Путиннинг таъкидлашича, концерт залидаги терактга буйруқ берганлар кўп миллатли Россияни ичкаридан бўлмоқчи бўлган. Террорчилар жамиятда ваҳима ва нафрат солмоқчи, миллий адоват, ксенофобия, исломофобияни қўзғатмоқчи бўлган.

«Сўнгги пайтларда содир бўлган фожиали воқеалардан фойдаланиб, миллий адоват, ксенофобия, исломофобия ва ҳоказоларни қўзғатишга йўл қўйиб бўлмайди», — дейди Владимир Путин.

Президентнинг сўзларига кўра, одамлар кўп тўпланадиган жойларда – спорт иншоотлари, транспорт, савдо марказлари, мактаблар, шифохоналар ва университетларда хавфсизликни янги босқичга кўтариш учун вазиятни имкон қадар холис таҳлил қилиш зарур.

Путин Россияга келаётганлар учун асосий қоидаларни айтиб ўтди
Россия раҳбари мамлакатга фақат унинг анъаналарини ҳурмат қиладиганлар келиши кераклигини таъкидлади.

«Россияда урф-одатларимиз, тилимиз, маданиятимиз, тарихимизни ҳурмат қиладиганларгина яшаши ва ишлашлари мумкин», — дейди Россия раҳбари.

Унинг қўшимча қилишича, ноқонуний миграцияга қарши курашиш Ички ишлар вазирлиги фаолиятининг устувор йўналишларидан бири бўлиши керак. Мамлакатда фаолият юритаётган жиноий синдикатлар трансчегаравий бўлиб, хорижий разведка хизматлари ва халқаро радикал гуруҳлар эмиссарлари билан ҳамкорлик қилади.

22 март куни кечқурун бир гуруҳ террорчилар «Пикник» гуруҳининг концерти ва рақс спорти бўйича Россия чемпионати бўлиб ўтаётган “Крокус Сити Холл” биносига ҳужум қилди. Жиноятчилар ташриф буюрувчиларга қарата ўқ узди, шунингдек, концерт залига ўт қўйди. Сўнгги маълумотларга кўра, 144 киши теракт қурбони бўлган, яна 695 киши жароҳатланган.

Террорчилар 23 мартга ўтар кечаси Брянск вилояти Карачевский тумани Хатсун қишлоғи яқинида қўлга олинди.