Ҳар бир ота-она фарзандининг соғлом ва бақувват бўлишига эътибор қаратади, келажакда бахтли ҳаёт кечириши учун ҳаракат қилади. Албатта, боланинг соғлом ўсиши, турли касалликларга чалинишининг олдини олиб, тўғри овқатланишига эътибор қаратилиши келгуси ҳаётини белгилайдиган омил ҳисобланади. Афсуски, шундай касалликлар борки болаларда умрбод мажруҳликка олиб келади. Полиомиелит ана шундай касалликлардан биридир. Касалликка чалинган бемор бир умрга ногиронга айланади.

Ҳозирги кунда шол касаллигининг олдини олишда энг самарали усул касалликка қарши эмлаш ҳисобланади. Хўш, полиомиелит касаллигини келтириб чиқарувчи омиллар нималар, аломатлари, унга қарши қандай чоралар кўриш лозим? Қуйида айнан шу саволларга жавоб олишингиз мумкин.

Полиомиелит – ўткир шол касаллиги бўлиб, уни майда, ҳатто оддий микроскопда ҳам кўриб бўлмайдиган вируслар чақиради. Касаллик асаб тизими, айниқса орқа мияни шикастлайди. Полиомиелит билан асосан 10 ёшгача бўлган болалар касалланадилар. Касалликнинг яширин даври ўртача 5-12 кун бўлиб, баъзида 35 кунгача давом этиши мумкин.

Касалликнинг юқиш йўллари ва келтириб чиқарувчи омиллари:

-касалликнинг ягона манбаи хасталикнинг енгил ёки яширин шакли билан оғриган бемор ҳисобланади;

- касаллик шахсий гигиена қоидаларига амал қилинмаганда, оғиз орқали ифлос қўл, вирус билан зарарланган сув ва озиқ-овқат маҳсулотлари, мева ва сабзавотлар орқали юқади.

- баъзан ҳаво-томчи йўли орқали ҳам юқиши мумкин.

Касаллик аломатларига қуйидагиларни киритиш мумкин:

•касалликнинг паралитик бўлмаган шаклида – кўпинча қисқа муддатли иситма, йўтал, томоқда оғриқ бўлади. Кўнгил айнийди, қусиш, ич кетиш кузатилади.

•паралитик шаклида – тана ҳарорати юқори бўлади, нафас қисилиши, шамоллаш белгилари, ошқозон-ичак фаолиятининг бузилиши, бошда, белда, оёқ-қўлларда кучли оғриқ, алаҳсираш ва менингиал белгилар, юз нерви ва мимик мускулларда фалажлик, оёқ, тана бўйин ва диагфрагмада бўшашган паралич кузатилиши мумкин.

Албатта, касалликка кўриладиган чора бормикин, деган савол туғилади. Касаллик аломатлари кузатилганда, шифокорга эрта мурожаат қилиш муҳим ҳисобланади. Албатта шифокорнинг тавсиясига кўра, даво муолажаларини олиш лозим. Фарзандларимизнинг соғлом бўлиши учун бу жуда муҳим жиҳатдир.

Профилактик тадбирлар:

полиомиелит касаллигининг олдини олишда ягона чора касалликка қарши эмлашдир. Миллий эмлаш календарига асосан, полиомиелитга қарши эмлаш болаларни 2, 3, 4 ва 16 ойлигида ва 7 ёшида оилавий поликлиникаларда ўтказилади.

Халқимизда касалликни даволагандан кўра, унинг олдини олган афзал деган нақл бор. Шундай экан, фарзандларимиз соғлиғига эътиборли бўлишни, ўз вақтида эмлатишни унутманг.