Ўзбекистонда бугундан Volkswagen Caddy савдоси бошланиши кутилмоқа. Бу ҳақда Спот манбаси хабар берди.

Қайд этилишича, 27 июль куни, яъни бугун эрталаб автомобилнинг онлайн-тақдимоти бошланди. Автомобилни бевосита келиб кўриш ёки уни сотиб олиш имконияти эса куннинг иккинчи ярмида яратиб берилади. Автосалон манзили эса Сергели тумани Обиҳаёт кўчаси, 39-уйда жойлашгани айтилган.

Хабарингиз бор, март ойида "Ўзавтосаноат" ва "Фолксваген Груп Рус" МЧЖ ўртасида битим имзоланган эди. Унга кўра, "Жиззах автомобиль заводи" компанияси базасида енгил тижорат автомобиллари ишлаб чиқариш бўйича келишувга эришилган.

Ишлаб чиқариш жараёнини тезлаштириш мақсадида июль ойида Volkswagen Caddy автомобилларининг илк партияси юртимизга олиб келиниб, сертификатлаш бўйича ваколатли органга берилган эди.

«Ўзавтосаноат» маълумотига кўра, 2020 йилда ушбу автомашинанинг тўртинчи авлодини, 2021 йилда эса бешинчи авлодининг тўлиқ циклини ишлаб чиқариш йўлга қўйилади.

Тўртинчи авлод 2015 йилда тақдим этилган бўлиб, у машҳур тижорат автомобили ҳисобланади. У нафақат йўловчи ёки юк ташиш учун, балки узоқ сафарлар ҳамда оилавий ҳордиқ чиқариш учун ҳам мўлжаллангани билан харидорлар эътиборини қозонган.

Унинг Ўзбекистонда уч хил кўринишда қуйидаги нархларда тақдим этилади:

Cargo (юк учун) — 172,1 млн сўм.

Kombi (аралаш) — 190 млн сўм.

Trendline (йўловчи учун) — 221,9 млн сўм.

Маълумот учун, Россияда Volkswagen Caddy тоифасига қараб 18 минг доллардан 33 минг долларгача сотилмоқда.