Ўзбекистоннинг Португалиядаги элчиси Сардор Рустамбоев Португалия от спорти мактаби – «EPAE» менежери Лино Рамос билан учрашди, деб хабар берди «Дунё» АА.

Учрашувда Португалия томони яқиндан ҳамкорлик қилиш ва Ўзбекистон от спорти федерацияси билан тажриба алмашишдан манфаатдор эканини билдирди.

Португалия от миниш ва от спорти санъатини ривожлантириш бўйича дунёда етакчи давлатлардан бири ҳисобланади. Португалиянинг от спорти модели ва энг яхши амалиётлари узоқ йиллардан буён Европа мамлакатлари учун намуна бўлиб келмоқда. Ушу соҳада Австрия, Буюк Британия, Францийа ва АҚШнинг етакчи ташкилотлари билан яқин ҳамкорлик ўрнатилган.

«EPAE» от спорти мактаби «лузитан» от зотини кўпайтириш билан шуғулланади. Айни пайтда дунёда 2 минг «лузитан» зотли отлар бор. Ушбу турнинг тенг ярми Португалияда парваришланмоқда.

«EPAE» раҳбарияти мактаб кенг жамоатчилик учун кўргазмали намойишлар ва ўқув машғулотларини ташкил этиш орқали чет эллик сайёҳларни жалб қилишга катта эътибор қаратаётганини таъкидлади.

Португалиянинг от спорти объектлари 2019 йилда 1 миллионга яқин сайёҳларни жалб қилди. Уларнинг 80 фоизи чет элликлардир.

Бундан ташқари, мактаб чавандозлари халқаро мусобақаларда ҳам муваффақиятли иштирок этиб келмоқда. Масалан, Пекинда 2008 йилда бўлиб ўтган ёзги Олимпия ўйинларида учта спортчи қатнашди.

«EPAE» вакилига кўра, спортчиларни халқаро мусобақалар ва Олимпия ўйинларига тайёрлаш Ўзбекистон билан ўзаро муносабатларнинг истиқболли йўналишларидан бирига айланиши мумкин.

Португалия томони ўзбекистонлик мутахассислар учун турли мавзуларда машғулотлар ташкил қилишда ёрдам беришга, шунингдек, яхши от зотини парваришлаш бўйича тажриба алмашишга тайёрлигини қайд этди.

Учрашув сўнгида ҳамкорликнинг кейинги босқичларни батафсил муҳокама қилиш, тегишли таклифларни ишлаб чиқиш мақсадида «EPAE» билан Ўзбекистон от спорти федерацияси ўртасида ҳамкорлик меморандумини имзолаш ва видеоконференсалоқа шаклида музокаралар ўтказишга келишиб олинди.