Фото: Ташқи ишлар вазирлиги

Ўзбекистон Республикаси Ташқи ишлар вазири Владимир Норов ЙХҲТ Ташқи ишлар вазирлари кенгаши йиғилишида сўзга чиқиб, минтақавий масалаларга алоҳида тўхталиб ўтди.

Вазир бугунги кунда Марказий Осиё минтақасида мутлақо янги ўзаро ишончга асосланган муҳит шаклланганини таъкидлади: кўплаб тўсиқлар бартараф этилди, фуқароларнинг эркин ҳаракатланиши учун шароитлар яратилди, ўзаро товар айирбошлаш ва инвестициялар ҳажмини ошириш, минтақавий ўзаро боғлиқлик, хавфсизлик ва барқарор ижтимоий-иқтисодий ривожланиш учун қулай муҳит шаклланди.

Жорий йилнинг июль ойида Қирғизистон Республикасида бўлиб ўтган Давлат раҳбарларининг тўртинчи Маслаҳат учрашувида Марказий Осиёни ХХИ асрда ривожлантириш бўйича чинакам тарихий Дўстлик, яхши қўшничилик ва ҳамкорлик шартномаси келишиб олинди.

Ўзбекистон делегацияси раҳбари таъкидлаганидек, Марказий Осиёда экологик муаммолар ҳамон долзарблигича қолмоқда. Минтақамиздаги иқлим ўзгаришининг суръати дунё бўйича ўртача кўрсаткичдан икки баравар кўп.

Шу нуқтаи назардан, В.Норов ЙХҲТни Орол денгизи экологик ҳалокати оқибатларини юмшатиш, Оролбўйида долзарб ижтимоий-иқтисодий лойиҳа ва дастурларни амалга ошириш бўйича ҳаракатларда фаол иштирок этишга чақирди.