Ўзбекистон Россияга юбориладиган помидорларнинг сифатини назорат қилишни кучайтирмоқчи. Бу ҳақда Спутник манбаси Россия Федерацияси Ветеринария ва фитосанитария назорати федерал хизмати маълумотига асосланиб хабар берди.

Қайд этилишича, Россия томони 2020 йилнинг декабрида помидорда зараркунандалар (жигарранг буришиш вируси (tomato brown rugose fruit virus) аниқлангани туфайли Навоий ва Қашқадарё вилоятларидан ушбу маҳсулот олиб кирилишини тақиқлаган эди. Кейинчалик чекловлар қисман бекор қилинганди.

Шу кунларда Россельхознадзор Ўзбекистон Республикаси Вазирлар Маҳкамаси ҳузуридаги Ўсимликлар карантини бўйича давлат хизмати инспекцияси вакиллари билан видеоанжуман ўтказди. Онлайн учрашувда Ўзбекистон РФга экспорт қилаётган помидорлар сифати билан боғлиқ муаммони қандай ҳал қилмоқчилиги муҳокама қилинди.

Россия идораси матбуот хизмати маълумотларига кўра, Ўзбекистон Ўсимликлар карантини бўйича давлат хизмати инспекцияси вакиллари республикада иссиқхоналарни ToBRFVга текширмоқда.

Бундан ташқари, яқин орада Ўзбекистон томони қуйидаги нормани жорий қилмоқчи: бунда корхоналардан маҳсулотларни жўнатишда давлат инспекторлари иштирок этади ва маҳсулот хавфсизлигини тасдиқловчи текширув гувоҳномасини беради.

Келгусида ушбу ҳужжатлар асосида карантин фитосанитар сертификатларини бериш режалаштирилган.

Шунингдек, Ўсимликлар карантини давлат инспекцияси вакиллари Россия томонига зарарланган маҳсулотлар етказилишига сабаб бўлган ҳолатларнинг текширув натижаларини яқин келажакда Россельхознадзорга юборилишини маълум қилишди.

Россельхознадзор Ўзбекистон томонидан кўрилаётган чораларни олқишлашини маълум қилди. Шу билан бирга, агар улар икки мамлакат ахборот тизимлари фитосанитария соҳасида иложи борича тезроқ интеграллашса, бу янада самара бериши ҳақида фикр билдирдилар.