Мамлакатимизнинг Куала-Лумпурдаги элчихонаси кўмагида ўзбек гилоси янги ҳосилининг навбатдаги жўнатмаси Малайзияга етказилди, деб хабар бермоқда «Дунё» АА.

Маҳсулотнинг умумий ҳажми 3 тоннани ташкил этади.

Тошкент вилоятида етиштирилган гилос Малайзиянинг «Deli Fruits Trading» импортчи компаниясига «Golden Prime Food» МЧЖ томонидан етказиб берилмоқда.

Юк Малайзия бозорида ўзбек маҳсулотларининг хабардорлигини ошириш учун «Ўзбекистоннинг энг сара гилослари» («Finest Cherries from Uzbekistan») махсус белгиси остида жўнатилди.

Малайзиянинг «Deli Fruits Trading» компанияси менежери Назатул Шиманинг сўзларига кўра, Ўзбекистон гилоси Малайзиянинг Куала-Лумпур шаҳри ҳамда Селангор ва Жохор штатларининг савдо тармоқларида сотилади. Унинг айтишича, Ўзбекистон мева-сабзавот маҳсулотларининг навбатдаги жўнатмаси жорий йилнинг июнь ойи ўрталарига мўлжалланган.

У, шунингдек, ушбу маҳсулотлар Малайзиядаги таниқли «Lazada» ва «Shopee» электрон савдо майдончалари орқали харидорларга тўғридан-тўғри етказиб берилаётганини ҳам маълум қилди.

Мамлакатимизнинг Куала-Лумпурдаги дипломатик ваколатхонаси Малайзия бозорида маҳаллий ишлаб чиқарувчиларимиз маҳсулотларини фаол тарғиб қилишда давом этади.