Архив фото

“Ўзбек давлат цирки” давлат муассасаси инқирозга тушиб қолган ва уни бу ҳолатдан чиқариш учун хусусий инвесторлар кўмагига таянилиши мумкин.

Ўзбек давлат циркини хусусий сармоядорга ишончли бошқарувга бериш режалаштириляпти. Бу Ўзбекистон Президентининг ”Ўзбек цирк санъатини янада ривожлантириш ҳамда “Ўзбек давлат цирки” давлат муассасаси фаолиятини қўллаб-қувватлаш чора-тадбирлари тўғрисида“ги қарори лойиҳасида ўз ифодасини топган.

Ҳужжатда қайд этилишича, давлат томонидан бошқариб келинаётган цирк инқирозли вазиятга тушиб қолган. Охирги 20 йилда томошабинлар сони 1052 нафардан 200-250 нафаргача камайиб кетган. Шунга яраша цирк ходимларининг ойлик иш ҳақлари ҳам жуда паст, ҳеч қандай молиявий қўллаб-қувватлаш йўқ, малакали кадрлар эса бирин-кетин чет давлатларига чиқиб кетяпти.

Шу муносабат билан лойиҳада 2019 йил 1 июнигача давлат-хусусий шерикчилик тамойили асосида инвесторни танлов асосида танлаш ўтказилади. Бу эса “Ўзбек давлат цирки”ни абгор вазиятдан чиқаришга ёрдам беради.

Хусусий компанияларни жалб этиш амалиёти ҳудудлар, жумладан, Самарқанд, Фарғона ва Хоразмда ҳам цирклар яратиш (500-700 ўринли) татбиқ этиш кўзда тутиляпти.

Хусусий капиталнинг жалб этилиши “Ўздавцирк”даги чиқишларнинг бадиий-ижодий қийматини ошириш ва бошланишига мухлислар сонини кунига 500, кейинчалик 1000 нафаргача кўпайтириш имконини беради.

2020 йилгача циркларнинг томошабинлар билан тўлиш даражасини 60, 2024 йилдан эса 75 фоизга ошириш мўлжалланмоқда.