Фото: «Халқ сўзи»

Нукус туманидаги «Қирантаў» овул фуқаролар йиғинида янги тикувчилик корхонаси қурилиб, фойдаланишга топширилди.

Корхонанинг тантанали очилиш маросимида сўз олганлар Президентимиз ташаббуси билан Оролбўйи аҳолисининг турмуш даражасини яхшилаш, ҳудудларни ижтимоий-иқтисодий комплекс ривожлантириш мақсадида Нукус туманига Самарқанд вилояти бириктирилгани ва бу борадаги ишлар натижасида янги тадбиркорлик субъектлари бунёд этилаётганини, қўшимча иш ўринлари яратилаётганини таъкидладилар.

Самарқандлик тадбиркорларнинг янги иш ўринларини яратишга қаратилган лойиҳаларидан бири «Қирантаў» ОФЙ ҳудудида «Aqmangʼit kamalak invest» МЧЖ томонидан тикувчилик маҳсулотларини ишлаб чиқаришни йўлга қўйиш эди. Умумий қиймати 5,4 млрд. сўмлик мазкур лойиҳа амалга оширилиши натижасида юз иш ўринли, замонавий ускуналар билан жиҳозланган корхона бунёд этилди.

— Корхонага ишга қабул қилинган маҳаллий ишчиларни ўқитиш ва тажрибаларини ошириш мақсадида Туркиядан тажрибали мутахассислар жалб этилди, — дейди моҳир чевар Алима Мамбетназарова. — Негаки, келгусида тикувчи қизларимиз ишлаб чиқарган маҳсулотлар ички бозорни таъминлаш билан бирга экспортга йўналтирилиши ҳам назарда тутилган. Ўзим Нукус туманидаги Шуртанбай касб-ҳунар коллежида айнан тикувчилик йўналишида ёшларга сабоқ берганман ҳамда бу борада анча йил ишлаб тажриба оширганман. Ҳозирда ушбу корхонага янги ишга қабул қилинган хотин-қизларга тикувчиликни ўргатмоқдаман.

Маълумотларга кўра, 2022-2023 йилларда Самарқанд вилояти тадбиркорлари томонидан Нукус туманида умумий баҳоси 513,1 миллиард сўмлик 34 лойиҳа рўёбга чиқарилиши режалаштирилган. Бунинг самарасида 2 мингдан ошиқ иш ўринлари вужудга келади. Бунда, энг аввало, «Темир дафтар», «Аёллар дафтари» ва «Ёшлар дафтари»га киритилган фуқаролар бандлигини таъминлашга эътибор қаратилади.

Ғ.Отажонов, «Халқ сўзи».