Нетаньяху Эрдоғанни ҲАМАСни қўллаб-қувватлагани учун танқид қилди
Фото: JINI
Исроил бош вазири Бинямин Нетаньяху Туркия президенти Режеп Таййип Эрдоғанни Фаластиннинг ҲАМАС ташкилотини қўллаб-қувватлаётгани учун танқид қилди.
“Уруш қоидаларига амал қилган Исроил, террор ташкилоти ҲАМАСнинг қотиллари ва зўравонларини қўллаб-қувватлаган, арман геноцидини инкор этаётган, ўз мамлакатида курдларни ўлдирган, мухолифатчи ва журналистлар ғойиб бўлаётган Эрдоғаннинг маънавиятини қабул қилмайди”, дейди у.
Бунгача Эрдоған Фаластин — Исроил можаросида Фаластиннинг ҲАМАС ҳаракатини қўллаб-қувватлашини тўхтатмаслигини айтган эди. Унинг таъкидлашича, Туркия гуруҳ етакчилари билан алоқаларини яширмайди ва ўз етакчиларини тўлиқ қўллаб-қувватлайди.
Ўтган йилнинг 2 декабрь куни Эрдоған Фаластиннинг ҲАМАС ҳаракатини ҳеч қачон террорчи гуруҳ сифатида тан олмаслигини айтганди. Туркия президенти, шунингдек, Исроил Ғазо секторидаги ҳарбий жиноятлар учун жавобгарликка тортилиши кераклигини таъкидлади.
Аввалроқ, Эрдоған Нетаньяху тез орада сумкаларини йиғиштириб, Исроилни тарк этишини истисно қилмаган эди.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг