Мусиқа ва санъатга ошнолик болаликдан бошланади. Наманганлик ўқувчи-ёшлар орасида ҳам ана шундай истеъдодлар бисёр. Улардан уч нафари Испанияда ўтказилган онлайн фестиваль-танловда муваффақиятли иштирок этиб, юксак эътирофга сазовор бўлди. Дунёнинг 120 давлатидан вакиллар иштирок этган “World Art Games” шиори остидаги мазкур танловда Наманган шаҳридаги 1-давлат ихтисослаштирилган умумтаълим мактабининг 7-синф ўқувчиси Аҳрормирза Раҳмонов 13 - 15 ёш тоифасида скрипка ҳамда фортепиано йўналиши бўйича иштирок этди. Унинг ҳар икки йўналишдаги ижро маҳорати биринчи ўринга лойиқ топилди.
 

Шаҳардаги 52-умумтаълим мактабининг 6-синф ўқувчиси Севара Умматалиева фортепиано йўналишида 10 - 12 ёш тоифасида 2-ўринга сазовор бўлди.

Унинг укаси, худди шу мактабнинг 4-синф ўқувчиси Отабек Умматалиев эса халқ чолғулари прима-рубоб йўналишида 10 - 12 ёшли тенгдошлари билан бўлган баҳсларда 2-ўрин соҳибига айланди. Иштирокчиларнинг ҳар бири халқаро тоифадаги диплом билан тақдирландилар. Эътиборлиси, фестиваль-танлов ғолиби Аҳрормирза Раҳмонов жорий йил сўнггида Испанияда ўтказиладиган тантанали тақдирлаш маросимида иштирок этади.
 

Қудратилла НАЖМИДДИНОВ,
 «Халқ сўзи».