Фото: "Халқ сўзи"

Қудратилла НАЖМИДДИНОВ/«Халқ сўзи». Бугун «Оролни қутқариш» бўйича ташаббус умуммиллий ҳаракатга айланиб улгурди. Юртдошларимиз бугун экологияни асраб-авайлаш учун Орол денгизининг чўл ҳудудларини кўкаламзорлаштириш ишига ўз ҳиссаларини қўшмоқдалар.

Наманган муҳандислик-технология институтининг иқтидорли талабалар ва профессор-ўқитувчиларидан иборат гуруҳ ҳам ана шу эзгу ҳаракатда қатнашиш учун Қорақалпоғистон Республикасининг Мўйноқ туманига келди.

«Яшил макон» умуммиллий лойиҳаси доирасида институт ҳузурида ташкил этилган «Яшил макон волонтёрлари» фаоллари томонидан Оролбўйи ҳудудининг иқлимига мос келадиган жийда, саксовул кўчатлари ва унинг уруғлари экилди.

— Мамлакат миқёсидаги хайрли ишга қўшилганимдан хурсандман, — дейди акция иштирокчиси Сайидали Ҳайиталиев. — Орол ҳақида кўп эшитганман лекин, биринчи маротаба ўз кўзим билан кўрдим. Намангандан Мўйноққа ўзимиз билан кўчатлар олиб келдик. Умид қиламизки, биз ўтқазган ниҳоллар Мўйноқ табиатининг янада гўзаллашишига хизмат қилади.

Наманганлик «Яшил макон волонтёрлари»нинг хайрли иши бир мавсум билан чекланиб қолмайди. Навбатдаги гуруҳ куз фаслида Орол денгизи ҳудудига бориб, кўчат экишни давом эттиради.