Қудратилла НАЖМИДДИНОВ/«Халқ сўзи». Айни йўналишда ҳамкорлик қилиш бўйича Наманган вилояти делегациясининг жорий йил июль ойида Хитой Халқ Республикасига ташрифи давомида келишувга эришилган эди.

Куни кеча Хитойдаги йирик «Everbrignt environment Limited» компанияси вакиллари ушбу масала бўйича Наманган вилоятига келди. Вилоят ҳокими Шавкат Абдураззоқов қабули чоғида Чуст туманида жойлашган 10 гектар майдонда чиқиндиларни қайта ишлаш орқали электр энергияси ҳосил қилиш лойиҳаси муҳокама қилинди. Бу лойиҳа «Зарафшон» кичик саноат зонасида амалга оширилади ва ижроси учун қиймати 150 миллион долларлик тўғридан-тўғри хорижий инвестиция йўналтирилади. Унинг ишга тушиши натижасида чиқиндилардан самарали фойдаланиш баробарида 400 кишини янги меҳнат ўринлари билан таъминлаш имконияти вужудга келади.

— Минтақа учун янгилик бўлган ишлаб чиқариш лойиҳаси босқичма-босқич амалга оширилади. Дастлабки босқични 2025 йилнинг тўртинчи чорагида, кейингисини эса 2026 йилнинг учинчи чорагида ишга тушириш кўзда тутилган, — дейди вилоят ҳокимининг ўринбосари Окибжон Иномов. — Жорий йил охиригача лойиҳани ривожлантириш учун 25 миллион долларлик инвестиция ўзлаштирилади.

Икки томонлама самарали мулоқотдан сўнг Хитой делегацияси лойиҳа жойлаштириладиган ҳудуд билан батафсил танишмоқда.