Ўзим уйда ўтириб, кашта тикиш орқали маблағ топишга киришдим. Ёнимга маҳалладошлар қўшилди. Уларнинг аксарияти ҳунармандчилик, хусусан, чопон, нимча, костюм тикиш, гилам тўқиш сингари қўл меҳнати турларини яхшигина эгаллади. Барини бирлаштириб касаначилик корпорациясини ташкил қилдик. Қисқа муддатда 73 киши унга аъзо бўлди.

Касаначиликнинг афзал томони, ишлаш учун уйдан чиқиш шарт эмас. Буюртмачи хом ашё билан кафолатли таъминлайди. Тайёрлаб берилган маҳсулот савдосини ҳам амалга оширади. Биз билан ҳамкорлик қилган тадбиркорларнинг уйда тикиб бераётган сўзана ва бошқа каштачилик буюмлари Қозоғистон, Туркия, АҚШ, Хитой давлатларигача етиб бормоқда. Ўтган йили 200 минг доллардан кўпроқ қийматдаги маҳсулотимиз экспортга чиқди.

Каштачилик, гилам тўқиш ҳам бир санъат. Масалан, бир дона мураккаб турдаги каштачилик буюмини қўлдан чиқариш учун 20-25 кунлаб тер тўкишга тўғри келади. Уларни асл ипакдан тикамиз. Меҳнатига тўланадиган ҳақ ҳам шунга яраша. Масалан, Робия Маърупова, Лобар Тожибоева, Гулбаҳор Жўрабоева сингари опа-сингилларимиз уйдан чиқмаган ҳолда ҳар ойда 3,5 – 4 миллион сўм ишлаб топмоқда.

Хуллас, касаначилар корпорациясини йўлга қўйганимиз шаҳардан четдаги аёллар бандлиги масаласини ечишдаги иштироки билан кўпчиликка маъқул тушди. Ҳозир биздан ўрнак олиб меҳнатни ташкил этишнинг ушбу шакли билан шуғулланаётганлар сони туманимиз бўйича 300 кишидан ортади. Буларни кўриб ўзбек аёлининг қўли гул, меҳнати баракали, дегингиз келади.

Одина МАДАМИНОВА,

Янги Наманган тумани.