Косон туманида пахта-тўқимачилик ишлаб чиқаришини кластер шаклини жорий этган «Бунёдкор» МЧЖда 2020 йилда 284 фермер хўжалиги билан контрактация шартномалари тузилган бўлиб, 22 690 тонна пахта хомашёси қабул қилиниб, ундан 2100 тонна ип-калава ишлаб чиқарилди. Шундан 2000 тонна ёки 3,7 млн АҚШ доллари миқдоридаги ип-калава хорижга экспортга чиқарилди. Энг муҳими корхона 172 нафар маҳаллий ёшлар учун доимий иш ўрни яратган.

Корхона жорий йилда яна 5 босқичли янги лойиҳани амалга оширишни кўзда тутган. Хусусан, лойиҳа қиймати 271090,0 млрд сўм бўлган қуввати йилига 900 тонна ип-калава ишлаб чиқаришга мўлжалланган замонавий ускуналар 2021 йилнинг 3-чорагида қурилиб ишга туширилади. Бу лойиҳа муваффақиятли амалга оширилгач, 350 нафар маҳаллий ёшлар бандлиги таъминланади.

Шунингдек, лойиҳа қиймати 90 971, 0 млрд сўмлик йилига 3953 тонна мато ишлаб чиқаришга мўлжалланган тўқимачилик ускуналари олиб келиниб, жорий йилнинг 3-чорагида ишга туширилади. Натижада 220 нафар янги иш ўрни очилади. Кейинги босқичда матодан тайёр маҳсулот ишлаб чиқаришга мўлжалланган 41 972, 0 млрд сўмлик дастгоҳлар келтирилиб, шу йилнинг 3-чорагида монтаж қилинади ва ишга туширилади. Бу лойиҳа доирасида 450 та янги иш ўрни очилади.

Лойиҳанинг 4- ва 5- босқичида чигитни қайта ишлаш (ёғ-мой заводи) бўйича 33270, 0 млрд сўм сўмлик ва чорвачилик комплекси барпо этиш бўйича 35000, 0 млрд сўмлик технологик ускуналар олиб келиб ўрнатилади ҳамда 250 та янги иш ўрни яратилади.

Фахриддин Бозоров,
«Халқ сўзи»