Коронавирусга чалинган аёл соғлом фарзандни дунёга келтирди
Фото: China Daily/Reuters
Хитойнинг Хэйлунцзян провинцияси Харбин шаҳридаги шифохонада коронавирус билан касалланган аёл соғлом қиз фарзандни дунёга келтирди. Бу ҳақда маҳаллий “ECNS” портали хабар берди.
Исм-шарифи очиқланманган бемор аёл ҳомиладорликнинг 38-ҳафтасида бўлган. 30 январь куни эса аёлнинг аҳволи ёмонлашгани боис шифокорлар гўдакни операция ёрдамида дунёга келтиришган. Янги туғилган чақалоқнинг вазни 3,05 килограммни ташкил этган. Шифокорлар қизалоқнинг соғлиғини Апгар шкаласи бўйича ўндан ўн, дея баҳолашмоқда.
Қизалоқнинг дунёга келишида иштирок этган шифокорлар коронавирус бўйича текширув ўтказишган. 31 январь ҳамда 2 февраль кунлари қизалоқдан олинган анализ иккала ҳолатда ҳам салбий натижа кўрсатган.
Ҳозирда гўдак ва унинг онаси алоҳида хоналарда бўлиб, шифокорлар назорати остида. Шифокорларнинг сўзларига кўра, аёл аста-секин тузалмоқда.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг