Бугунги кунда қишлоқ хўжалигида кооперация соҳасидаги ҳуқуқий-меъёрий асослар соҳадаги муносабатларни бевосита тартибга солувчи норматив-ҳуқуқий ҳужжатларнинг кўплиги билан тавсифланади. Ушбу ҳолат у ёки бу қонунчилик ҳужжатларида мустаҳкамланган мавжуд нормаларни амалиётда қўллаш жараёнида кўп сонли масалаларнинг келиб чиқишига сабаб бўлмоқда. Шу муносабат билан, қишлоқ хўжалигининг ўзига хос хусусиятларидан келиб чиққан ҳолда соҳада кооперация муносабатларни тартибга солишнинг унификациялаштирилган ҳуқуқий асосини яратиш зарурати юзага келган.

Шундан келиб чиқиб, «Қишлоқ хўжалиги кооперацияси тўғрисида»ги қонун лойиҳаси ишлаб чиқилди. Мазкур лойиҳаси Олий Мажлис Қонунчилик палатасининг 2021 йил 3 март куни бўлиб ўтган навбатдаги мажлисида депутатлар томонидан биринчи ўқишда кўриб чиқилди.

Қонун лойиҳаси юзасидан Қишлоқ хўжалиги вазири Ж. Ходжаев маъруза қилди.

Таъкидланганидек, қонун лойиҳаси 9 та боб ва 48 та моддадан иборат. Лойиҳада Ўзбекистон Республикаси қишлоқ хўжалиги кооперациясини ташкил этиш ҳамда фаолият юритишининг ҳуқуқий ва иқтисодий асослари белгилаб берилган. Қонун лойиҳасида йирик кооперацияларни ташкил этиш, улар фаолиятини мувофиқлаштириш, давлат томонидан қўллаб-қувватлаш, молиялаштириш бўйича рағбатлантирувчи чора-тадбирларни қўллаш масалалари ўз аксини топган.

Шунингдек, лойиҳада қишлоқ хўжалиги кооперациялари фаолияти шаклининг асосий тамойиллари мустаҳкамланмоқда, кооперативни ташкил этиш механизмлари белгиланмоқда.

Қонун лойиҳасининг қабул қилиниши қишлоқ хўжалигида кооперация муносабатларни шакллантиришнинг ҳуқуқий асосини яратиш, кооперативлар фаолиятини ривожлантириш ҳамда хўжалик субъектлари учун муносабатларни муфассал ҳуқуқий тартибга солишга ёрдам беради. Шунингдек, қишлоқ хўжалигида кооперация муносабатларини тартибга солувчи нормаларни ягона ҳужжатда унификация қилишга ва тизимлаштиришга, соҳадаги муносабатларни комплекс ҳуқуқий тартибга солишга ҳамда қонун ҳужжатларидаги зиддиятлар ва бўшлиқлар бартараф этилишига эришилади.

Кун тартибидаги қолган масалалар Олий Мажлис Қонунчилик палатасининг эртага бўлиб ўтадиган мажлисида кўриб чиқилади.