Фото: Newsweek

Россия Федерацияси Президенти Администрацияси раҳбарининг ўринбосари Дмитрий Песков АҚШ президенти Дональд Трампга уюштирилган суиқасдга изоҳ берди.

Қайд этилишича, Песков бу қотилликка уринишни амалдаги ҳукумат уюштирганига ишонмаслигини, аммо Трамп атрофида яратилган сиёсий муҳит шундай ҳодиса юз беришига сабаб бўлганлигини таъкидлади.

Аввал хабар берганимиздек, кеча АҚШнинг собиқ президенти Дональд Трампга суиқасд уюштирилди. Ҳодиса у Пенсильванияда ўз тарафдорлари билан учрашув вақтида юз берди. Трамп қулоғидан яраланди ва хавфсизлик хизмати ходимлари қуршовида воқеа жойини тарк этди.

Махфий хизмат ўқ узган одамни ўлдирган. Ҳодиса оқибатида сайловолди митинг иштирокчиларидан бири ҳалок бўлган, яна икки нафари оғир яраланган. Федераль қидирув бюроси ушбу ҳодиса бўйича терговда асосий вазифани ўз зиммасига олган.

Аниқланишича, Трампни ўлдирмоқчи бўлган шахс Пенсильвания штатида яшаган 20 ёшли Томас Мэтью Крукс бўлиб чиққан. Вакиллар палатасининг Назорат ва жавобгарлик қўмитаси Дональд Трампга суиқасд бўйича тергов бошлаган.

Суиқасд ҳодисаси Трампнинг омма олдида чиқиш пайтидаги хавфсизлиги бўйича хавотирларни уйғотди. Шунга қарамасдан, Дональд Трамп бундай эмоционал вазиятдан фойдаланиб қолишни режалаштирмоқда.

Россия расмийлари суиқасдни АҚШ ҳукуматининг Украинани қўллаб-қувватлаётгани билан боғлади. Уларнинг фикрича, Киевга юборилган маблағлар АҚШ ҳуқуқ-тартибот тизимини яхшилашга сарфланиши керак, Буни Россия ташқи ишлар вазирлиги расмий вакили Мария Захарова ўз баёнотида таъкидлаган.

Аввалроқ, саккиз нафар конгрессмен Трампга суиқасд уюштирилишида Байденни айблаётгани ҳақида хабар берилганди.