Хошиминдан Истанбулга учаётган самолёт Самарқандда фавқулодда қўнди
Вьетнамнинг Хошимин шаҳридан Истанбулга йўл олган «Turkish Airlines» авиакомпаниясининг ТК163 рейси Самарқанд халқаро аэропортига фавқулодда қўнди. Бу ҳақда «Uzbekistan Airports» хабар берди.
Маълум қилинишича, Boeing 787 экипажи бортдаги йўловчилардан бирининг соғлиғи ёмонлашгани сабабли муқобил аэродромга йўл олишга қарор қилган. Самолёт Самарқандга Тошкент вақти билан соат 03:40 да қўнган. 1959 йилда туғилган Франция фуқароси бўлган йўловчига тезкор тиббий ёрдам кўрсатилган.
Дастлабки маълумотларга кўра, юрак хуружи гумон қилинмоқда. Йўловчи ва унга ҳамроҳ бўлган икки киши қўшимча текширув ва даволаниш учун тиббиёт ходимларига топширилган.
Зарур амалиётлар бажарилгандан сўнг, парвоз давом эттирилган. Маҳаллий вақт билан соат 05:11 да «Turkish Airlines» авиакомпаниясининг рейси Истанбулга жўнаб кетган.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг