Хитой Тайванга қурол етказиб бергани учун АҚШнинг 13 та қурол ишлаб чиқарувчи мудофаа ширкати ва олти нафар раҳбарига қарши санкциялар жорий қилди

«АҚШ яқинда Хитойнинг Тайван ҳудудига навбатдаги қурол сотишни маъқуллади. Бу ҳолат Хитой ва АҚШнинг учта қўшма баёноти қоидаларини очиқдан-очиқ бузади. Бундай ҳаракатлар билан АҚШ Хитойнинг ички ишларига аралашиб, мамлакат суверенитети ва ҳудудий яхлитлигига путур етказмоқда», — дейилади ТИВ хабарида.

Қора рўйхатга киритилган жисмоний ва юридик шахсларнинг мол-мулки музлатилади. Улар билан тадбиркорлик фаолияти билан шуғулланиш тақиқланади. Қора рўйхатдан жой олган ширкат раҳбарларининг Хитойга киришига йўл қўйилмайди. Ушбу чекловлар 2024 йил 5 декабрдан кучга киради, дейилади Хитой Ташқи ишлар вазирлиги баёнотида.

Вашингтон 1979 йилда Тайван билан дипломатик муносабатларни узиб, Хитой билан алоқа ўрнатган. «Ягона Хитой» сиёсатини тан олган ҳолда, АҚШ Тайван маъмурияти билан алоқаларни давом эттирмоқда ва оролни қурол билан таъминламоқда. Хитойнинг ҳисоб-китобларига кўра, сўнгги йилларда АҚШ Тайванга 70 миллиард доллардан ортиқ ҳарбий ёрдам кўрсатган.