Италия қачон Россия газига тобеликдан қутилиши мумкинлигини маълум қилди
Иллюстратив фото
Италия 2024 йилнинг иккинчи ярмида Россия газига тобеликдан қутилиши мумкин. Бу ҳақда мамлакат Экологик модернизация ва трансформациялар вазири Роберто Чинголани «La Repubblica» газетасига берган интервьюсида айтиб ўтди.
«2024 йилнинг иккинчи ярмига келиб биз Россия гази импортига барҳам беришимиз керак», дейди Чинголани.
Унинг сўзларига кўра, мамлакат газ қувурлари орқали етказиб беришни кўпайтириш орқали Россия газига тобеликдан қутилмоқчи. Мисол учун, уч йил ичида Жазоирдан импорт 3 баробар кўпайиб, 9 миллиард куб метрга етиши керак. Бундан ташқари, Жазоир, Ангола, Конго ва Қатар билан тузилган келишувлар туфайли 2022 йилдаёқ импорт қилинадиган суюлтирилган газ ҳажми 1,5 миллиард куб метрга ошади.
Унинг фикрича, газ, суюлтирилган газ етказиб беришни кўпайтириш ва янги қайта тикланадиган энергия манбаларини яратиш каби ёндашувлар комбинацияси Италияга ҳар йили Россиядан келадиган 29 миллиард куб метр газ ўрнини қоплашга ёрдам беради.
Олдинроқ, Германия Россия нефтидан қачон тўлиқ воз кечишига ойдинлик киритгани ҳақида хабар берган эдик.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг