Фото: Anadolu Agency

Ироқ жанубидаги Носирия шаҳридаги касалхонада юз берган ёнғин оқибатида камида 50 киши ҳаётдан кўз юмган, яна ўнлаб одамлар тан жароҳати олган. Бу ҳақда "Associated Press" ахборот агентлиги хабар бермоқда.

Олдинроқ қурбонлар сони 46 нафар экани айтилган эди. Ироқ соғлиқни сақлаш вазирлиги маълумотига кўра, касалхонада "COVID-19" билан зарарланган касаллар бўлган. 

Ёнғинга қисқа туташув ёнғинга сабаб бўлгани айтилмоқда. Бошқа манбаларга кўра, ўт кислород балонининг портлаши натижасида келиб чиққан. Соғлиқни сақлаш вазирлиги ёнғин сабабларини ҳозирча расман эълон қилмаган.

Агентликнинг ўз манбаларига таяниб хабар беришича, ёнғин содир бўлган бўлим уч ой олдин очилган ва у 70 беморга мўлжалланган.

Соғлиқни сақлаш вазирлигининг маҳаллий вакили ОАВга ёнғин бошланган пайтда бўлимда камида 63 нафар бемор бўлганини айтиб ўтган.

Таъкидланишича, бино тез ёнувчи материаллардан қурилган.

Бу Ироқдаги "COVID-19" касалхонасида содир бўлган биринчи йирик ёнғин эмас. Шу йилнинг баҳорида Боғдоддаги касалхонада юз берган ёнғин оқибатида 82 киши ҳалок бўлган эди. Ўшанда ўт кислород балонининг портлаши оқибатида келиб чиққани айтилган эди.

Шу кунларда Ироқда "COVID-19" тарқалишининг навбатдаги тўлқини кузатилмоқда. Мамлакатда ҳар куни 9 мингдан ортиқ янги ҳолатлар қайд этилмоқда.