Мамлакатимиз иқтисодиётига хусусий инвестицияларни жалб қилишга катта эътибор қаратиляпти. Бундан кўзланган асосий мақсад иқтисодиётни эркинлаштириш, бозор иқтисодиёти шароитида рақобатбардош ва жаҳон стандартларига мос маҳсулотлар ишлаб чиқаришга қаратилган. Президентимизнинг қатор Фармонлари давлат иштирокидаги корхоналарни ислоҳ қилишни жадаллаштириш ҳамда давлат активларини хусусийлаштириш масалаларини ўз ичига олган.

Хусусан, Президентимизнинг 2021 йил 11 февралдаги «Давлат активларини хусусийлаштириш жараёнларини янада жадаллаштириш тўғрисида»ги Фармонида ҳам халқаро консалтинг, аудиторлик ва инвестиция маслаҳатчилари, инвестиция банклари ва бошқа ихтисослашган компанияларни жалб этган ҳолда давлат активларини хусусийлаштиришнинг замонавий усулларини жорий этиш амалиёти йўлга қўйилаётгани қайд этилган. Фармонга мувофиқ давлат активларини оммавий савдоларга қўйишда ва уларни сотиш жараёнларини ташкил этишда профессионал ташкилотларни жалб этиш Давлат активларини бошқариш агентлиги ёки “UzAssets” инвестиция компанияси томонидан энг яхши таклифларни танлаб олиш асосида амалга оширилиши белгиланди. Бунда, улар билан тузиладиган шартномаларни экспертизадан ўтказиш талаб этилмаслиги инвесторлар учун катта имкониятлар яратади.

Бундан ташқари баҳолаш ташкилотининг баҳолаш тўғрисидаги ҳисоботида тавсия этилган ва унинг экспертиза хулосасида аниқланган нархни давлат активининг бошланғич нархи сифатида мажбурий белгилаш тўғрисидаги талаб амал қилмаслиги, Давлат мулкини сотишда тендер савдоларини ўтказиш бўйича давлат комиссиясига давлат активларининг бошланғич нархини эълон қилмаган ҳолда сотиш тўғрисида эълонлар бериш ҳамда 2 тадан кам бўлмаган таклифлар орасида энг яхшиси асосида сотиш бўйича қарорлар қабул қилиш ваколати берилгани ҳам бу борадаги фаолиятни янада жадаллаштириш учун имконият яратади.

Эркинлик бор жойда ютуқ ва муваффақиятларга қозонилади, замонавий бозор тамойилларига мослашиш осон кечади. Шу боис бугун мамлакатимизда иқтисодиётни эркинлаштириш давлат иштирокини камайтириш орқали амалга оширилмоқда. Зеро, эркин иқтисодий муҳит барқарор мамлакат равнақ топади, ўсиш нуқталари кўпаяди.

Барно МИРЗАМОВА,
Олий Мажлис Қонунчилик палатаси депутати