Коронавирус инфекциясини юқтирганларнинг ҳақиқий сони расмий статистикадан бир неча баробар кўп бўлиши мумкин.

Бу ҳақда Британия Колумбияси университетининг энг йирик биология институтини бошқарувчи австриялик иммунолог ва генетика мутахассиси Ёзеф Пеннингер маълум қилмоқда.

«Биз ҳамон глобал коронавирус пандемиясининг чўққисига чиққанимиз йўқ. Ваҳоланки, агар ҳозирда камида 30 миллион одам ушбу хасталикни юқтирган деб ҳисобласангиз, норасмий маълумотларга кўра, эҳтимол, бу рақам 10 баравар кўпни ташкил этар", дейди мутахассис.

Кўп йиллар давомида SARS коронавирусларини, шу жумладан, 2002-2003 йилларда биринчи эпидемияни ўрганган мутахассиснинг таъкидлашича, ўша пайтда 8 минг киши ушбу хасталикни юқтириб олган, вирусни енгиш учун эса 10 ой вақт керак бўлган. Шу боисдан ҳам Пеннингернинг сўзларига кўра, пандемиянинг тез орада якунланиши кутмаслик керак.

Шунинг билан бирга, мутахассиснинг қайд этишича, бутун дунё бўйлаб аҳолини эмлаш бир ёки ҳатто икки йил давом этиши мумкин. Бироқ кўплаб одамларнинг аллақачон коронавирусга қарши эмлашни рад этишаётганлиги вазиятни янада мураккаблаштириши эҳтимоли юқори.