Илoн Маск бойлиги 800 миллиард доллардан ошган дунёдаги илк инсонга айланди. Бу ҳақда “Forbes” маълум қилди.

Қайд этилишича, бу SpaceX компанияси Маскка тегишли сунъий интеллект ва ижтимоий тармоқ йўналишидаги xAI компаниясини сотиб олганидан кейин рўй берди. Ушбу келишув бирлашган компанияни 1,25 триллион долларга баҳолаб, Маскнинг бойлигини 84 миллиард долларга ошириб, рекорд даражада — 852 миллиард долларга етказди.

Унга қадар Маск SpaceXʼнинг тахминан 42 фоиз улуши (336 миллиард доллар)га эгалик қилиб келаётган эди. Шунингдек, унинг номида xAIʼнинг 49 фоиз акциялари ҳам бор бўлиб, компаниянинг жорий ойдаги хусусий инвестиция раундидаги баҳоси 250 миллиард долларни ташкил этган. Бирлашувдан кейин эса SpaceX 1 триллион долларга, xAI эса 250 миллиард долларга баҳоланди.

Forbes ҳисоб-китобига кўра, Маск эндиликда бирлашган компаниянинг 43 фоиз улушига эга бўлиб турибди, унинг қиймати 542 миллиард долларга тенг. Бу SpaceXʼни Маскнинг энг қиммат активига айлантирди.

Шу билан бирга, у Teslaʼнинг 12 фоиз акцияларига эгалик қилади — уларнинг бозор қиймати 178 миллиард доллар. Қўшимча равишда, Маскка тегишли Tesla акция опционлари яна 124 миллиард долларга баҳоланади. Бунга ноябрь ойида акциядорлар маъқуллаган рекорд маош пакети киритилмаган: ушбу пакет Tesla келгуси 10 йил ичида “Марсга отиш” деб аталган улкан ўсиш кўрсаткичларига эришса, Маскка қўшимча равишда 1 триллион долларгача акция олиш имконини бериши мумкин.

Сўнгги тўрт ой ичида Илoн Маск бойлик бўйича тўртта йирик маррани забт этди. Октябрь ойида у илк бор 500 миллиард долларлик бойликка эришди, декабр ўрталарида — 600 миллиард доллар, орадан тўрт кун ўтиб эса 700 миллиард долларлик чегарадан ўтди. Энди эса у тарихда биринчи бўлиб 800 миллиард долларлик бойликка эга инсон сифатида қайд этилди.