Узоқ йиллар давомида дунёнинг энг бой одамлари бешлигидан америкаликлар, европаликлар ва баъзида мексикаликлар ўрин олиб келишади. Аммо бу анъана шу ҳафтада бузилди.

Гап шундаки, ҳиндистонлик миллиардер Мукеш Амбани 24 июль куни Стив Балмерни ортда қолдириб, дунё бойлари рўйхатининг бешинчи ўрнига кўтарилиб олди. Ҳозирда Амбанининг умумий бойлиги 77,4 миллиард АҚШ долларини ташкил қилмоқда.

25 июль жума куни Амбанининг бойлиги яна 3.5 миллиардга кўпайди ва бу билан у Марк Сукербергга яқинлашиб олди. Бу ўсиш 63 ёшли Амбанининг сўнгги муваффақиятларидан бўлиб, унинг бойлиги 2020 йилнинг бошидан бери 22.3 миллиардга кўпайган.

"Reliance Industries LTD” компанияси раҳбари Мукеш Амбани йил бошидан бери "Bloomberg"нинг бойлар рўйхатидан тўққиз поғона юқорилади. Унга тегишли компанияларнинг акциялари мартдан бери 145 фоизга ошган.

Амбани энг бой одамлар рўйхатининг ўнталигига ўтган ойда кирганди. У икки ҳафта олдин Варрен Баффетни ортда қолдирди. Шундан кейин ҳиндистонлик миллиардер бирин-кетин Илон Маск ва Google асосчиларидан бўлган Сергей Брин ва Ларри Пеижни қувиб ўтди.

Айни пайтда Осиёнинг иккинчи энг бой одами бўлиб турган “Tencent Holdings Ltd” асосчиси Пони Ма эса дунё бойлари орасида 18-ўринни эгаллаган.

Дунёдаги энг бой бўлган 500 кишининг рўйхатини тузувчи "Bloomberg" маълумотларига кўра, бу йили Осиё миллиардерлари бойлик тўплаш бўйича Австралиядан бошқа барча қитъалардаги бойлардан анча ўзиб кетишмоқда.