Ҳиндистонда коронавирус билан зарарланганлар сони 20 миллион нафардан ортиб кетди. Сўнгги 24 соат ичида мамлакатда яна 350 мингдан ортиқ янги ҳолатлар аниқланган.

Маҳаллий шифохоналар анчадан бери босимга дош беролмаяпти. Ётоқ жойлар, дори-дармон ва кислород етишмаслиги кузатилмоқда. Шу боис кўнгиллилар лагерларни ташкил этиб, касалхоналарга жойлаша олмаётган одамларга ёрдам кўрсатишга киришган. Улар кўчаларда ҳаёт билан курашаётган инсонларни қутқаришга, уларни кислород билан таъминлашга ҳаракат қилмоқдалар.

«Ҳеч ким кислород этишмаслигидан ўлмаслиги керак! Ҳозирги кунда бу миллионлаб одамларга керак бўлган ягона нарса. Агар кислород касалларга мавжуд бўлса, улар омон қолади. Шунинг учун биз бутунлай бепул кислород лагерларини ташкил этдик. Ҳеч кимдан пул олмаймиз, ва ҳатто лагерга келишга қодир бўлмаган беморларга ҳам ёрдам кўрсатамиз», дейди Гурприт Сингх Рами.

Турли мамлакатлар Ҳиндистонга коронавирус инқирозидан чиқиш учун ёрдам бермоқда. Бортида инсонпарварлик юклари бўлган самолётлар тез-тез ушбу мамлакатга келиб қўнмоқда. Жумладан, Ўзбекистон ҳам ушбу мамлакатга гуманитар ёрдам юборган эди.