Фото: Reuters

Исландия НАТОга аъзо мамлакатлар ичида биринчи бўлиб Финляндия ва Швециянинг ҳарбий альянсга қабул қилиниши маъқуллади. Бу ҳақда Финляндиянинг "Yle" телерадио портали хабар бермоқда.

Исландия президенти Гудни Торлатиус Йоханнессон чоршанба куни бу борадаги тегишли ҳужжатни имзолаганидан кейин у АҚШ Давлат департаментига юборилган.

Шунингдек, Шимолий Атлантика шартномасининг Финляндия ва Швециянинг қўшилиши ҳақидаги протоколларини ратификация қилиш тўғрисидаги қарор чоршанба куни Эстония парламенти томонидан қабул қилинди. Чоршанба куни чақирилган парламентнинг навбатдан ташқари сессиясида 101 депутатдан 79 нафари Шимолий Атлантика шартномасининг Финляндия ва Швециянинг қўшилиши ҳақидаги баённомаларини тасдиқлашни ёқлаб овоз берди. Эътиборлиси, қарши ҳамда бетараф овозлар ҳам бўлмади.

«Финляндия ва Швециянинг НАТОга қўшилиши ва иккала давлатнинг НАТОнинг сиёсий ва ҳарбий тузилмаларига муаммосиз интеграциялашуви Эстония манфаатларига мос келади. Сизни ишонтириб айтаманки, НАТО эшиклари қуйидаги давлатлар, жумладан, Украина учун очиқ қолади. Ҳеч бир учинчи давлат, шу жумладан Россия ҳам НАТОга ким қўшилиб, ким кирмаслигини ҳал қила олмайди», деди Эстония ташқи ишлар вазири вазифасини бажарувчи, тадбиркорлик ва ахборот технологиялари вазири Андрес Сутт.

Жорий йилнинг 5 июль куни Брюсселда НАТОга аъзо давлатларнинг доимий вакиллари аъзолик протоколларини имзолаган эдилар. Шундан сўнг, НАТОга аъзо давлатлар ўзларининг миллий қонунчилигига мувофиқ протоколларни тасдиқлашлари керак эди. Шу тариқа, Исландия ва Эстония биринчилардан бўлиб, Финляндия ва Швеция НАТОга қабул қилинишига ўз хайрихоҳлигини билдирди.

Таъкидлаш жоизки, Финляндия ва Швеция альянснинг барча аъзо давлатлари қўшилиш протоколларини ратификация қилгандан сўнг расман НАТО аъзоларига айланадилар. 

НАТО Бош котиби Йенс Столтенберг протоколларни имзолашдан олдин айтганидек, бу жараён бир неча ой давом этиши мумкин.