Фото: Муҳсин Умурзоқов / «Халқ сўзи»

«Ўзгидромет» 16-20 март кунлари кузатиладиган об-ҳаво маълумотларини эълон қилди.

Унга кўра, ҳафтанинг дастлабки уч кунида Ўзбекистон ҳудудининг катта қисмида ёғингарчиликсиз об-ҳаво бўлиши кутилмоқда. Фақат 17-18 мартда Сурхондарё вилоятида ва 18 мартда Қашқадарё, Самарқанд вилоятларининг баъзи жойларида ёмғир ёғади.

19 мартда республиканинг марказий ва жануби-шарқий ҳудудларида айрим жойларда ёмғир кўринишидаги ёғингарчилик кузатилади. 20 март куни эса Ўзбекистон ҳудуди бўйича ёғингарчилик бўлмайди.

Ушбу даврда ҳаво ҳарорати асосан кечалари 5-10 даража илиқ, кундуз кунлари 15-20 даража илиқ, ёмғир пайтида 13-15 даража илиқ бўлади. Билдирилишича, бундай ҳарорат фони март ойи ўртаси учун ўртача кўп йиллик қийматларга яқиндир.

16-17 март кунлари республиканинг шимолида ва чўл ҳудудларида шамол тезлиги 13-18 метр/секундгача кучайиши мумкин.

Тошкент шаҳрида 16-18 ва 20 март кунлари ёғингарчилик кутилмайди. 19 мартда вақти-вақти билан ёмғир ёғади. Шарқий шамол йўналишини ўзгартириб, ғарбдан 3-8 метр/секунд тезликда эсади. Ҳарорат асосан кечалари 5-10 даража илиқ, кундуз кунлари 17-20 даража илиқ, 19 мартда 14-17 даража илиқ бўлади.