Фото: «Халқ сўзи»

Фарғона вилояти ҳокими Хайрулло Бозоров Хитойнинг Feng Yuan компанияси раҳбари Гойин Фу бошчилигидаги делегацияни қабул қилди.

Учрашувда Хитой компанияси томонидан Фарғона вилояти ҳудудида замонавий когенерация тизими, яъни, бир пайтнинг ўзида иссиқлик ва электр энергиясини ишлаб чиқаришни йўлга қўйиш, кичик ГЭСлар қуриш ҳамда биочиқиндилардан энергия олишга қаратилган инвестиция лойиҳаларини амалга ошириш истиқболлари кўриб чиқилди.

Фарғона вилояти ҳокимлиги ахборот хизматининг «Халқ сўзи» мухбирига хабар беришича, бугунги кунда вилоятда аҳоли ва ижтимоий соҳа объектларини иссиқлик ва электр энергияси билан узлуксиз таъминлашда бу каби инновацион лойиҳаларни ҳаётга татбиқ этишда хорижий инвестицияларни жалб этишга жиддий эътибор қаратиляпти. Хусусан, бу борада катта харажат талаб қилмайдиган ихчам гидростанциялар қуриш орқали қўшимча энергия қуввати манбалари яратиш устувор вазифа сифатида белгиланган.

Юзма-юз мулоқотда Хайрулло Бозоров вилоят ҳокимлиги томонидан Feng Yuan компанияси томонидан кўзда тутилаётган лойиҳалар ҳар томонлама қўллаб-қувватланишини маълум қилди.

Таъкидлаш ўринлики, Хитой компанияси мамлакатимизда энергетика лойиҳаларини амалга оширишда лойиҳалаштиришдан фойдаланишга топширишгача бўлган жараённи қамраб олувчи кластер тизими ташкил этишни режалаштирмоқда.

Ботир Мадиёров, «Халқ сўзи».