Фото: Халқ сўзи

Фарғона шаҳридаги Механика заводи ҳудудида жойлашган кичик саноат зонасида “Central Asia Motors” корхонаси томонидан электромобиллар ишлаб чиқариш лойиҳаси доирасида сўнгги босқичдаги тайёргарлик ишлари олиб борилмоқда.

Шу тариқа корхонада кейинги икки йилда босқичма-босқич электромобиллар учун эҳтиёт қисмлар тайёрлашни ўзлаштириш ҳамда енгил ва юк электромобилларини ишлаб чиқаришни йўлга қўйиш ишлари ниҳоясига етказиляпти. Лойиҳани ҳаётга татбиқ этиш учун 5 млн. доллар тадбиркорнинг ўз маблағи, 5 млн. доллар банк кредити ҳамда 40 млн. доллар тўғридан-тўғри хорижий инвестиция жалб этиш режалаштирилган.

Фарғона вилояти ҳокимлиги ахборот хизматининг «Халқ сўзи» мухбирига маълум қилишича, лойиҳа тўлиқ якунланганидан кейин корхонада 350 дан ортиқ янги иш ўрни яратилади. Бу ерда йилига 10 минг электромобиль ишлаб чиқариш йўлга қўйилади ва унинг 40 фоизи экспортга йўналтирилади.

Шунингдек, лойиҳа ташаббускорлари томонидан вилоятда электромобиллар учун кузов, заряд станцияси, аккумулятор эҳтиёт қисмларини маҳаллийлаштириш кўзда тутилмоқда.

Ботир Мадиёров, «Халқ сўзи».