Европа комиссияси (ЕК) Европа Иттифоқи (ЕИ) бозорида "AstraZeneca" компаниясининг коронавирусга қарши вакцинасидан фойдаланишга рухсат берди. Бу ҳақда ЕК раҳбари Урсула фон дер Ляйен маълум қилди.

"Биз "AstraZeneca" вакцинаси Европа Иттифоқи дори-дармон агентлиги (ЕМА) томонидан ижобий баҳоланганидан кейин фойдаланишга рухсат бердик. Энди мен компания билан олдин келишилганидек, 400 миллион доза препарат етказиб берилишини кутмоқдаман" деган ЕК раҳбари.

Жума куни ЕМА ушбу вакцинани ЕИ бозорида фойдаланиш учун тасдиқлашни тавсия қилди.

Олдинроқ ЕМА ва ЕК томонидан "Pfizer/BioNTech" вакцинасидан 600 миллион, "Moderna" вакцинасидан 160 миллион доза сотиб олиниши тасдиқланган эди.

Бундан ташқари, ЕК "Johnson & Johnson", "Sanofi-GSK", "CureVac" вакциналарини сотиб олиш борасида ҳам шартномалар тузилган. Фақат бунинг учун уларнинг самарали ва хавфсизлиги тасдиқланиши керак. Ҳозирча ушбу ишлаб чиқувчилар ўз маҳсулотларини ЕИ бозорида тасдқилаш учун аризалар топширмаган.

Умуман олганда, ЕК турли компаниялар билан тахминан 450 миллион аҳолиси бўлган ЕИ мамлакатлари учун 2,3 миллиард дозадан кўпроқ вакцинага шартнома қилгани айтилмоқда. ЕК эса ушбу вакциналарни учинчи мамлакатларга бериши мумкинлигини билдирган. Бироқ, ҳозиргача ЕИ келишилган миқдордаги дозаларни олишда қийинчиликларга дуч келмоқда.