Фото: AP

Европа Иттифоқи (ЕИ) Россиянинг Донецк халқ республикаси ва Луганск халқ республикасини тан олишига жавобан 350 га яқин россияликларга нисбатан санкциялар жорий этишни муҳокама қилмоқда. Бу ҳақда "Bloomberg" хабар бермоқда.

Қайд этилишича, ЕИ томонидан аниқланган шахслар орасида Россия Давлат думаси депутатлари ҳам бўлади. Чекловларни киритиш учун ЕИ давлатларининг розилиги талаб қилинади.

«Шубҳасиз, бу жавоб санкциялар кўринишида бўлади, вазирлар менинг таклифим асосида унинг мазмунини муҳокама қиладилар. Ва ишончим комилки, у бир овоздан қабул қилинади», дейди Европа Иттифоқи дипломатияси раҳбари Хосеп Боррел.

Аввалроқ, Бундестаг ташқи сиёсат қўмитаси раиси Майкл Рот Ғарбда шахсий манфаатларга эга бўлган «Путин олигархлари»га қарши зудлик билан санкциялар қўллашга чақирган эди.

Бир кун аввал Россия президенти Владимир Путин россияликларга мурожаат қилиб, ўзини ўзи эълон қилган Донеск ва Луганск халқ республикалари мустақиллигини тан олиш зарурлигини таъкидлаган эди.

Кейинроқ, Владимир Зеленский Киев Россиянинг ўзини ўзи эълон қилган Донбасс республикаларини тан олишини Украина суверенитети ва ҳудудий яхлитлигини бузиш ва Россиянинг Минск келишувларидан чиқиши сифатида кўришини айтди.