Эфиопиянинг Судан ва Жанубий Судан билан чегарадош Бенишангуль-Гумуз вилоятига қилинган ҳужум натижасида 100 дан ортиқ одам ҳалок бўлди. 

Бу ҳақда “Reuters” ҳуқуқ ҳимоячиларига асосланиб хабар берди.

Таъкидланишича, ҳодиса Бекожи қишлоғида тонг саҳарда содир бўлган. Маълумотларга кўра, ушбу аҳоли пункти "этник зўравонлик билан ўралган" ҳудудда жойлашган.

Маҳаллий ҳокимият вакиллари ҳужумчилар ким эканлигига ҳали аниқлик киритишмаган.

Ҳуқуқ фаолларининг сўзларига қараганда, аввалги ҳужумларда ўрмонлардан келган одамлар иштирок этишган.

Фермер Белай Важеранинг “Reuters” агентлигига айтишича, унинг оиласи ўқлар овози сабаб уйғонган ва ташқарига чиқишганида "Уларни ушланг!" деган сўзларни эшитган. Ҳужум натижасида фермер орқасидан жароҳат олган, рафиқаси ҳамда беш фарзанди эса отиб ўлдирилган, яна тўрт нафар бола бедарак йўқолган. Важеранинг ўзи уй яқинидаги майдонда 82 кишининг жасадини, қорин қисмидан жароҳатланган Ҳассен Йимам исмли яна бир фуқаро бошқа жойда ҳалок бўлган 20 кишини кўрган. 

Маҳаллий шифокорларнинг сўзларига кўра, 38 киши, асосан, ўқотар қуролдан яраланган. Беморларнинг айтишича, ҳужумчилар пичоқ ҳам ишлатган.

Агентлик маълумотларига кўра, касалхонада вафот этганлар орасида беш яшар бола ҳам бор.