Ўзбекистон дунёнинг энг кучли паспортлари рейтингида бир поғона пастлади. Бу кўрсаткич «Henley & Partners» халқаро консалтинг компанияси томонидан тузилган рейтингида қайд этилган.

Келтирилишича, Ўзбекистон мазкур рейтингда 79-ўринни эгаллаган, унга кўра, мамлакат фуқаролик паспортига эга бўлганлар 64 та давлатга визасиз ёки соддалаштирилган тартибда кириш имконига эга. Айтиш жоиз, 2023 йилда Ўзбекистон ушбу рейтингнинг 78-ўринни банд қилганди.

Ўзбекистондан ташқари Куба, Монголия ва Мозамбик каби мамлакатлар ҳам 79-ўринда қайд этилган.

Рейтингда биринчи ўринни Сингапур паспорти эгаллаган бўлиб, ушбу мамлакат фуқаролари 195 та мамлакатга визасиз кириш имкониятига эга. Рейтингда иккинчи ўринни эса Франция, Германия, Италия, Япония ва Испания (194 та давлатга визасиз кириш) банд қилган. Австрия, Финляндия, Исландия, Люксембург, Нидерландия, Жанубий Корея ва Швеция эса 193 та давлатга визасиз кириш имконияти билан рейтингнинг учинчи ўрнини эгаллаган.

Марказий Осиё давлатларининг паспорт рейтингидаги ўрни қуйидагича:

• Қозоғистон 67-ўрин (79 та давлат);
• Қирғизистон 78-ўрин (65 та давлат);
• Тожикистон 82-ўрин (60 та давлат);
• Туркманистон 90-ўрин (52 та давлат).