АҚШ Президенти Дональд Трамп мамлакатни коронавирус пандемиясидан кейин инқироздан олиб чиқиш учун “Американинг буюк иқтисодий тикланиши” лойиҳаси амалга оширилишини маълум қилди. Оқ уй расмий сайтида лойиҳага кимлар жалб этилгани эълон қилинди.

“Американинг энг етакчи раҳбарларидан ташкил топган мазкур гуруҳлар Оқ уй маъмурияти билан биргаликда Американинг келажакдаги мисли кўрилмаган тараққиёт йўлини белгилаш устида иш олиб боради. Саломатлик ва бойлик Американинг бош мақсади ва бу гуруҳлар нисбатан мустақил миллатнинг асосини яратади”, дейилади Оқ уй ҳисоботида.

Оқ уй қишлоқ хўжалиги, банк, қурилиш, мудофаа, энергетика, молия, озиқ-овқат, соғлиқни сақлаш, кўчмас мулк, технология, алоқа, транспорт, спорт каби соҳалар бўйича гуруҳлар тузган. Гуруҳларга жами 200 га яқин мутахассислар киритилган.

Уларнинг орасида дунёга машҳур бизнесменлар, молиячи, спорт соҳаси вакиллари ҳам бор. Жумладан, Илон Маск Tesla бош директори; Жефф Безос Amazon компаниясининг бош директори; Тим Кук Apple бош директори; Марк Цукерберг Facebook бош директори; Жеймс Куинси Coca-Cola бош директори; Крис Кемпчински, McDonaldʼs бош директори; Ажай Банга Mastercard президенти; Дана Уайт, Ultimate Fighting Championship (UFC) президенти ва бошқа кўплаб корпорациялар менежерлари Оқ уй рўйхатига киритилган.

Лойиҳага жалб қилинган шахсларнинг асосий вазифаси инқироздан кейин АҚШ иқтисодиётини тиклаш масаласида Трампга маслаҳат бериш.