Чустда солиқ қарздорлигини ёпиб беришни ваъда қилган шахслар ушланди
Давлат хавфсизлик хизматининг Наманган вилояти бўйича бошқармаси ҳамда Иқтисодий жиноятларга қарши курашиш департаменти вакиллари иштирокида ўтказилган тадбирда Чуст туманида яшовчи, 1992 йилда туғилган аёл ашёвий далиллар билан қўлга олинди.
Аниқланишича, ушбу фуқаро савдо соҳасида фаолият юритувчи масъулияти чекланган жамият (МЧЖ) иш юритувчисининг ишончига кирган. У корхонанинг 376,6 миллион сўм миқдоридаги солиқ қарздорлигини тизимда ишловчи танишлари орқали бартараф этиб бериш эвазига 20 миллион сўм талаб қилган. Мазкур маблағни олаётган вақтида ушланган.
Терговга қадар текширув ҳаракатлари давомида ушбу ноқонуний ишга Чуст тумани солиқ инспекциясининг бош инспектори алоқадор эканлиги аниқланди.
Ҳозирда мазкур ҳолат юзасидан айбдор шахсларга нисбатан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, фуқаролар шу каби қонунбузилиш ҳолатларига дуч келганда ДХХнинг 1520 қисқа рақамига хабар беришлари сўралади. Мурожаатчининг шахси сир сақланиши кафолатланади.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг