Фото: AP

Буюк Британияда Қиролича Елизавета II ҳокимиятни шаҳзода Чарльзга топшириш жараёни бошланган. Бу ҳақда Daily Express нашри Буюк Британия монархиясини ўрганувчи тарихчи Эд Оуэнс таяниб хабар бермоқда.

«Қироличанинг ўлими қироллик оиласида инқирозга олиб келмайди. Ҳокимиятнинг рамзий маънода Чарльзга ўтиши аллақачон бошланган», дейди Оуэнс. Шу ўринда у сўнгги пайтларда шаҳзода муҳим воқеалар пайтида онасини тез-тез алмаштириб турганига эътибор қаратган.

Сўнгги пайтларда 95 ёшли Қироличанинг саломатлигида муаммолар кузатилмоқда. Жумладан, октябрь ойининг охирида шифокорлар унга оммавий тадбирлардан танаффус қилишни тавсия қилишди. Шундан сўнг у Шимолий Ирландияга ташрифини бекор қилди, БМТнинг Глазгодаги иқлим конференциясига боришдан бош тортди ва кўрикдан ўтиш учун шифохонага борди. Ноябрь ойида Елизавета II Хотира кунини нишонлаш маросимларида қатнашмади.

Аввалроқ, экспертлар шаҳзода Чарльзнинг қирол бўлиш имкониятларини шубҳа остига қўйгани хабар қилинганди. Хусусан, тарихчи Мартин Винер унинг тахтга ўтириши Миллатлар Ҳамдўстлигининг парчаланишига олиб келиши мумкинлигини таъкидлаган.

Шаҳзода Чарльз Елизавета IIнинг тўнғич ўғли бўлиб, Қиролича вафотидан кейин Буюк Британия тахтига ўтади. Ундан ташқари қироличанинг яна учта фарзанди бор: малика Анна, шаҳзодалар Эдуард ва Эндрю. 

Буюк Британия тахтига иккинчи даъвогар Чарльзнинг ўғли шаҳзода Уилям ҳисобланади. Унинг укаси шаҳзода Гарри ва унинг рафиқаси 2020 йилда қироллик оиласи сифатидаги вазифаларидан воз кечган ва АҚШга кўчиб кетган.