Фото: “Халқ сўзи”

2022 йил давомида Бухорода якка тартибдаги тадбиркорлар ва ҳунармандлар томонидан 165 килограмм миқдорида заргарлик буюмлари ишлаб чиқарилди. Шунинг 80 килограмми олтин, 85 килограмми эса кумушдан тайёрланган зебу зийнатлардир. Бухоро шаҳридаги “BURXONOVA SABINA“ хусусий корхонаси биносида вилоят ҳокимлиги, “Ўзбекзаргарсаноати” уюшмаси ва бошқа манфаатдор ташкилотлар ҳамкорлигида ташкил этилган заргарлик кўргазма – савдосида ана шу ҳақда маълум қилинди.

Тадбир давлатимиз раҳбарининг 2019 йил 18 майдаги “Ўзбекистон Республикасида заргарлик тармоғини жадал ривожлантириш чора-тадбирлари тўғрисида”ги ПФ-5721-сон Фармони ижроси доирасида ўтказилди. Ундан кўзланган мақсад мамлакатимиз заргарлик саноати вакиллари маҳсулотларининг ички бозордаги ўрнини мустаҳкамлаш, импорт ўрнини босувчи зебу зийнатлар ассортиментини тақдим этишдан иборат бўлди.

Шу ўринда бир далилга эътиборни қаратиш жоиз. Вилоятда 2022 йилда фуқаролик ҳолати далолатномаларини ёзиш органлари томонидан 16 минг 227 та никоҳ қайд этилган. Бундан ташқари, турли юбилей, туғилган кун ва шу каби маросимлар сабаб заргарлик буюмларига талаб бор. Бироқ тадбирда таъкидланишича, вилоятда сотилаётган заргарлик буюмларининг 30 – 35 фоизи хориждан келтирилмоқда. Ваҳоланки, Бухорода заргарлик санъати тарихи узоқ тарихга бориб тақалади. Уни кўз қорачиғидек асраб – авайлаб келаётган усталар кўп. Қосимжон Мироқов ана шундай заргарлардан.

— Заргарлар сулоласининг еттинчи авлодимиз, — дейди у. — Юздан зиёд турдаги зебу зийнатлар тайёрлаяпмиз. 15 нафар шогирдим бор. Фикримча, юртимизда тайёрланган заргарлик маҳсулотларини дунё бозорига чиқариш учун имкониятларимиз етарли. Чунки Бухоро заргарлик маҳсулотларининг дизайни ўзига хос. Зебу зийнатларимиз оригинал, содда, нафис. Асл тошлардан фойдаланамиз. Муҳими, заргар ҳалол ишлаши керак. Шунда у барака топади. Маҳсулотларимизни хорижий бозорларга чиқариш учун чет элларда ўтказиладиган халқаро кўргазма ва фестивалларда қатнашишимиз, ўзаро тажриба алмашишимиз керак, деган фикрдаман. Бусиз мақсадга эришиш мушкул.

Кўргазмага қайтадиган бўлсак, унда республиканинг бошқа ҳудудларидан ўндан зиёд заргарлик саноати корхоналари, йигирма нафардан ортиқ маҳаллий заргар, зебу зийнатлар савдоси билан шуғулланадиган ўттизга яқин тадбиркор ўз маҳсулотлари билан қатнашди.Тадбир якунида улар ўртасида шартномалар тузилди, кооперация алоқалари ўрнатилди.

Истам ИБРОҲИМОВ, “Халқ сўзи”.