АҚШнинг яна бир ҳарбий кемаси Эрон томон йўлга чиқди – Трамп
АҚШ президенти Дональд Трамп Аёва штатидаги тарафдорлари олдида нутқ сўзлаб, Теҳрон Вашингтон билан келишувга рози бўлишига умид қилаётганини билдирди. Бу ҳақида «Контекст» Telegram-канали хабар берди.
Маълумки, аввалроқ, АҚШ Марказий қўмондонлиги «Avraam Linkoln» номли авиаташувчисининг Ҳинд океани бўйлаб Эрон томонга ҳаракатланаётганини тасдиқлаган эди.
Қўшма Штатлар раҳбари бугун, 28 январь куни яна бир ҳарбий кема Теҳрон тарафга қараб ҳаракатланаётгани ҳақида айтиб ўтди.
«Ҳозирда яна бир ажойиб армада Эронга қараб йўл олмоқда. Умид қиламанки улар келишувга рози бўлади. Шунинг учун, улар томон йўлга чиққан ҳарбий кемалардан фойдаланишимиз фақатгина вақт масаласи бўлиб қолмоқда», — деган Оқ уй раҳбари.
Шунингдек, АҚШ Марказий қўмондонлиги мамлакат ҳарбий-ҳаво кучлари Яқин Шарқда кўп кунлик жанговар тайёргарлик машқларини бошлашини ҳам маълум қилган.
«New York Times» газетасининг ёзишича, Эрон томон ҳаракатланаётган «Avraam Linkoln» авиаташувчи кема тез орада Эронга етиб боради ва зарба бериш учун шай ҳолатга келади.
Изоҳлар
Ҳозирча ҳеч ким фикр билдирмаган. Балки Сиз биринчилардан бўларсиз?
Изоҳ қолдириш учун тизимга киринг