Иллюстратив фото

АҚШда беш ёшгача бўлган болаларни "Pfizer-BioNTech" ва "Moderna" компанияларининг коронавирусга қарши вакциналари билан эмлашга рухсат берилди. Бу ҳақда АҚШ президенти Жо Байденнинг ёзма баёнотида айтиб ўтилган.

Оқ уй раҳбарининг сўзларига кўра, бугун АҚШда инфекцияга қарши курашда муҳим қадам бўлди. Унинг таъкидлашича, Қўшма Штатлар бундай эмлашларга рухсат берган дунёдаги биринчи давлат бўлди.

Байден ушбу дорилар хавфсиз эканлигини қўшимча қилди. Унинг сўзларига кўра, улар ота-оналарга фарзанди "COVID-19"дан ҳимояланганлигига ишонч беради.

Сиёсатчининг таъкидлашича, Қўшма Штатларда 220 миллиондан ортиқ одам тўлиқ эмланган, 100 миллиондан зиёди эса қайта эмланган.

Аввалроқ, Жаҳон соғлиқни сақлаш ташкилотининг Россиядаги вакили Мелита Вуйнович 2022 йилда "COVID-19" билан касалланиш кўпайиши ҳақида ўз фикрларини айтиб ўтган эди. "Кўп одамлар эмлаш ёки табиий равишда вирус билан учрашмаганлигини ҳисобга олсак, касалланишнинг маълум даражада ошишини кутиш мумкин", деган эди эксперт. 

Сўнгги кунларда Ўзбекистонда ҳам коронавирус билан боғлиқ ҳолатлар яна кўпайган. Хусусан, 18 июнь куни юртимизда 108 кишида коронавирус инфекцияси қайд этилди. Бир кун олдин эса 90 кишида вирус аниқланган. Ундан аввалги кунларда янги ҳолатлар сони 60 тага ҳам етмаётган эди.