Фото: AP

Вашингтон аллақачон Эроннинг сулҳ таклифининг учта асосий бандини бузган. Бу ҳақда Эрон парламенти спикери Муҳаммад Бағир Ғолифаб айтиб ўтди.

«АҚШ президенти аниқ таъкидлаганидек, Эроннинг ўн бандлик таклифи «музокаралар учун амалий асос» ҳисобланади... Бироқ, ҳозиргача ушбу таклифнинг учта банди бузилган», — дейди у.

Ғолибаф Ливанга қилинган ҳужумларни, АҚШ дронининг Эрон ҳаво ҳудудига бостириб киришини ва Теҳроннинг уранни бойитиш ҳуқуқидан маҳрум қилинишини тилга олди. У бундай шароитда икки томонлама сулҳ ёки музокаралар амалий эмаслигини таъкидлади.

Эрон президенти Маъсуд Пезешкиён ҳам Исроил кун давомида бир неча бор сулҳни бузганини айтди ва қатъий жавоб беришга ваъда берди. Эрон ташқи ишлар вазири Аббос Арақчи илгари бу масалани Теҳрон ва Вашингтон ўртасида воситачи сифатида ишлаган Покистон билан муҳокама қилган эди.

Чоршанба куни АҚШ ва Эрон икки ҳафталик сулҳга келишиб олди. Исроил армияси ҳам ҳужумларни тўхтатганини эълон қилди, аммо «Ҳизбуллоҳ» ҳаракатига қарши операциясини давом эттирди. Ливан жанубидаги ўндан ортиқ шаҳарларга ҳаво ҳужумлари ва артиллерия зарбалари берилди. Сўнгги маълумотларга кўра, Исроил армияси ҳужумлари оқибатида 250 нафардан ортиқ одам ҳалок бўлган.

Шу билан бирга, оммавий ахборот воситалари хабарларига кўра, Исроил АҚШ билан биргаликда Эрон жанубидаги нефтни қайта ишлаш заводига ҳужумлар уюштирган. Ислом инқилоби қўриқчилари корпуси Форс вилояти устида «Hermes 900» дрони уриб туширилгани ҳақида хабар берди. Эроннинг «Fars» ахборот агентлигининг хабар беришича, Исроилнинг Ливанга ҳужумлари билан бир қаторда, Ҳўрмуз бўғози орқали танкерлар транзити ҳам тўхтатилди.

Сулҳ шартларига кўра, Теҳрон Ҳўрмуз бўғозида хавфсиз навигацияни таъминлашга ваъда берган. Таъкидланишича, Эроннинг ўн банддан иборат режаси келажакдаги келишувнинг асосини ташкил қилиши мумкин. У Эронга қарши санкцияларни бекор қилишни, Ҳўрмуз устидан назоратни таъминлашни, уранни бойитиш ҳуқуқини, шунингдек, тажовуз қилмаслик мажбуриятини ва Исроилнинг «Ҳизбуллоҳ»га қарши операциясини ўз ичига олган барча жабҳаларда ҳарбий ҳаракатларни тўхтатишни ўз ичига олган.

Трамп Эрон билан келишув муваффақиятсиз бўлса, кенг кўламли жанглар билан таҳдид қилмоқда

АҚШ президенти Доналд Трамп агар Эрон билан тинчлик шартномаси муваффақиятсиз бўлса, ҳарбий ҳаракатларни кучайтириш билан таҳдид қилди.

«Агар бирон сабабга кўра бу [келишув – таҳр.] амалга ошмаса, бу жуда эҳтимолдан йироқ бўлса, зарбаларнинг интенсивлиги мисли кўрилмаган даражага етади», — дея ёзди у «Truth Social» ижтимоий медиа платформасида.

Трампнинг қўшимча қилишича, АҚШ қўшинлари, самолётлари ва кемалари Теҳрон билан келишув амалга оширилгунга қадар минтақада қолади.

Шунга қарамай, Исломободда Эрон — АҚШ музокаралари ҳали ҳам 10 апрелга режалаштирилган.