Фото: Халқ сўзи

Азалдан гуллар шаҳри дея эътироф этилган ва айни пайтда ўзининг жозибадор табиати ва ноёб тарихий меъморий ёдгорликлари билан меҳмонларни ўзига ром этаётган Наманган мамлакатимизнинг қулай туризм масканларидан бирига айланиб бормоқда.

Буни, жумладан, қадимий ва навқирон масканга ташриф буюраётган хорижий сайёҳлар салмоғи ортиб бораётгани мисолида ҳам кузатиш мумкин. Америкалик ёзувчи, ўзининг замонавий, тарихий мавзудаги романлари билан ном қозонган, бир неча адабий мукофотлар соҳибаси Сюзан Уэлч куни кеча Наманганда бўлди. У ҳамроҳи Брюс Женсен билан дилтортар шаҳарнинг диққатга сазовор жойлари билан танишгандан сўнг Тўрақўрғон туманидаги қадимий Ахсикент ёдгорлиги ва Янги Ахси мажмуасига саёҳат қилди.

— Ахсикент буюк тамаддун ўчоғи, ипак йўлининг энг буюк шаҳарларидан бири экан. Биз Наманганга айнан Ахсикентни кўриш учун келдик ва бу ерда 2500 йиллик тарихдан сўзловчи қазишма ишларига гувоҳ бўлдик, —дея таассуротларини сўзлайди машҳур адиба. — Янги Ахсидаги улкан мажмуа ва осори-атиқалар музейи бизга жуда ёқди. Ҳар икки манзилда тарихни абадийлаштириш учун олиб борилаётган кенг кўламли ишлар ҳақида батафсил маълумот олдик. Бу заминнинг буюк ўтмиши, айниқса, шоҳ ва шоир Заҳириддин Муҳаммад Бобур билан алоқадор ҳар бир воқеага оид ҳикоялар ҳайратлантирди. Кўрганларимиз яратилажак тарихий асарларимга яхшигина мавзу бўлади, албатта. Меҳмонлар ташриф давомида Сирдарё ҳавзаси табиати, гўзал Наманган шаҳри, унинг бетакрор гастрономиясидан баҳраманд бўлдилар.

                                                  Қудратилла НАЖМИДДИНОВ, “Халқ сўзи”.