Олий Мажлис Қонунчилик палатасининг мажлисида норма ижодкорлиги фаолиятини такомиллаштириш бўйича амалга оширилаётган ишлар юзасидан депутатлар Адлия вазири А. Тошқуловнинг Қонунчилик палатасининг парламент сўровига жавобини муҳокама қилдилар.

Ўрганишлар натижалари юзасидан шакллантирилган парламент сўровига берилган жавобда қуйидагилар аниқланди. 2023 йилнинг тўққиз ойи давомида Адлия вазирлигига 210 та қонун лойиҳаси тақдим этилган бўлиб, шундан 186 таси ҳуқуқий ҳуқуқий экспертизадан ўтказилган, 24 таси эса Вазирлар Маҳкамасининг Регламентига мувофиқ ҳолда тақдим этилмаганлиги сабабли ҳуқуқий экспертизадан ўтказилмасдан қайтарилган.

Ҳуқуқий экспертизадан ўтказилган норматив-ҳуқуқий ҳужжатлар лойиҳаларининг 135 тасига розилик имзоси қўйилган, 51 таси розилик имзоси қўйилмасдан эътирозлар билан қайтарилган.

Ушбу даврда ҳуқуқий экспертизадан ўтказилган 186 та қонун лойиҳасига қонунчилик ҳужжатларига номувофиқлиги юзасидан 612 та, қонунчилик техникаси қоидаларига риоя этилмаганлиги бўйича 193 та эътирозлар билдирилган. Шунингдек, мазкур қонун лойиҳалари юзасидан 20 та ҳолатда ҳаволаки нормаларнинг асослантирилмаганлиги бўйича эътирозлар билдирилган.

Бундан ташқари, идоравий норматив-ҳуқуқий ҳужжатларни юқори юридик кучга эга бўлган қонунчилик ҳужжатларига ўтказиш, ўхшаш муносабатларни тартибга солувчи ҳужжатларни унификация қилиш ва «тартибга солиш гилотинаси» усулини қўллаган ҳолда амалда ўз аҳамияти ва долзарблигини йўқотган ҳужжатларни бекор қилиш бўйича сўнгги йилларда тизимли ишлар амалга ошириб келинмоқда.

Хусусан, 2021–2022 йиллар ҳамда 2023 йилнинг 9 ойи давомида 802 та идоравий норматив-ҳуқуқий ҳужжат ўз кучини йўқотган деб топилган. Уларнинг 330 таси яхлит, 472 таси ўзгартириш ва қўшимчалар киритиш тўғрисидаги идоравий норматив-ҳуқуқий ҳужжатлар ҳисобланади.

Парламент сўровига келган жавобда келтирилганидек, Норматив-ҳуқуқий ҳужжатларнинг коррупцияга қарши экспертизаси амалиётини мувофиқлаштириш борасида ҳам қатор ишлар амалга оширилган. Жумладан, 2023 йилнинг 9 ойи давомида 1 521 та норматив-ҳуқуқий ҳужжат лойиҳалари коррупцияга қарши экспертизадан ўтказилганда, уларнинг 228 тасида 350 та коррупциявий омиллар аниқланган ҳамда лойиҳа ишлаб чиқувчиларига уларни бартараф этиш бўйича тегишли таклифлар берилган.

Депутатлар тақдим этилган маълумотларни таҳлил қилар экан, ҳуқуқбузарликларни содир этишга шарт-шароит яратувчи, жисмоний ва юридик шахслар учун ортиқча маъмурий ҳамда бошқа чекловларни белгиловчи қоидалар ва нормаларни бартараф қилишга қаратилган норматив-ҳуқуқий ҳужжатлар лойиҳаларини ишлаб чиқишга алоҳида эътибор қаратилиши фуқароларнинг конституциявий ҳуқуқ ва эркинликларининг таъминланишига хизмат қилишини таъкидлашди.

Мажлисда парламент сўровига жавоб маълумот учун қабул қилинди.