Фото: “Роскосмос” / Лола туманлиги

“Роскосмос” Халқаро хотин-қизлар куни арафасида ўзининг Telegram каналида гулларга ўхшаш космик туманлик суратларини эълон қилди. Россия давлат космик корпорацияси бу фотосуратларни “8 март учун космик гулдаста” деб атади.

“Коинот баҳордан қолишмайдиган гўзалликлар яратади. Астрофотограф объективида минглаб ёруғлик йиллари масофасида жойлашган улкан “юлдуз ҳосил бўлиш ҳудудлари” акс этган”, дейилади суратлар изоҳида.

Тақдим этилган фотосуратларда бир нечта машҳур туманликлар тасвирланган. Жумладан, Лола туманлиги — “Оққуш юлдуз туркуми”да жойлашган ёруғ водород булути, Атиргул туманлиги — диаметри 100 ёруғлик йилидан ортиқ бўлган “космик гул”, шунингдек, юлдузлар ҳосил бўлаётган ҳудуд сифатида танилган Ирис туманлиги ҳам кадрларга тушган.

Бундан ташқари, фотоларда йирик юлдуз ҳосил бўлиш минтақаси ҳисобланган Юрак туманлиги ва у билан газ оқимлари ҳамда умумий юлдуз “туғилиш” тарихи орқали боғланган Руҳ туманлиги ҳам акс этган.

Мутахассисларнинг таъкидлашича, бу “космик гуллар” ёш ва жуда қайноқ юлдузлар тарқатадиган кучли нурланиш таъсирида шаклланади. Ана шу нурланиш водородни ёрқин пушти рангларда ёритилишига олиб келади. Таъкидланишича, инсон кўзига гўзал “гул барглари”дек кўринадиган жойларда аслида гравитацион сиқилиш ва янги юлдуз тизимлари пайдо бўлишининг кучли жараёнлари кечаётган бўлади.