Ўзбекистон элчихонаси томонидан янги мавсумда Британия қишлоқ хўжалиги соҳасига ўзбекистонлик меҳнат мигрантларини жалб қилиш мақсадида «Pro-Force Limited» ва «HOPS Labour Solutions Ltd» рекрутинг агентликлари вакиллари билан музокаралар ўтказилди.

Томонлар янги мавсумда Британия қишлоқ хўжалиги соҳасидаги ишларга ўзбекистонлик меҳнат мигрантларини жалб қилишни муҳокама қилди ва жорий йилнинг февраль ойида «Pro-Force Limited» агентлигининг Тошкентга ташрифини ташкил этишга келишилди.

Компания билан 3 мингга яқин сараланган номзодлар босқичма-босқич Буюк Британияда иш билан таъминланади.

Рўйхатдан ўтиш 10 январь куни агентликнинг «xorijdaish.uz» портали орқали амалга оширилиб, жараён соат 15:00 дан 19:00 гача давом этади.

Бунинг учун хорижга чиқиш паспорти, фаол электрон почта (унда исм-фамилия «загран» паспорт билан бир хил бўлиши керак), паспортдаги каби ўлчамда фотосурат керак бўлади. Онлайн рўйхатдан ўтиш танловнинг кейинги босқичларида иштирок этишни кафолатламайди. Сараланганлар билан онлайн суҳбат 14−15 январь кунлари ташкил этилади.

Тест маълумотлари фақат рўйхатдан ўтган ва иш берувчи томонидан танланган фуқароларга электрон почта орқали юборилади. Танланган номзодлар билан офлайн суҳбат ўтказилади ҳамда қўшимча кўрсатмалар берилади.

Қабул қилинганларга соатига 11,44 евро (12 доллар) миқдорида иш ҳақи берилади. Иш берувчи ҳафтасига камида 32 соат ишлашни кафолатлайди. Виза (298 фунт стерлинг — 373 доллар) ва авиачипта харажатлари номзодларнинг ўзлари томонидан қопланади.