Тадқиқотчилар 1892 йилда Мичиганнинг Юқори ярим ороли яқинидаги «Супериор» кўлида бўрон оқибатида чўкиб кетган савдо кемасини топдилар. Бу ҳақида «NBS News» нашри хабар берди.

Унга кўра, афсонавий Титаникнинг чўкишидан 20 йил олдин яна бир йирик кема денгиз қарига ғарқ бўлган. Мутахассисларнинг таъкидлашича, ушбу юк кемаси океанни кесиб ўтган биринчи пўлатдан ясалган кема бўлиши мумкин.

Тадқиқот таҳлилларига кўра, ушбу кема ўз давридаги денгиз транспортларининг тезлик рекордини янгилаш учун қурилган.

«Салкам юз метр узунликка эга бўлган мазкур юк ташувчи кема ўзининг тузилиши, тезлиги ҳамда имкониятлари туфайли замонасининг энг хавфсиз сув транспорти бўлиши керак эди. Унинг эгаси Питер Минч бўлиб, ўз кемаси билан жуда фахрланган», дейилади тадқиқотчилар ҳисоботида.

Питер Минч ўз давридаги энг машҳур ва бой инсонлардан бири бўлган. У турмуш ўртоғи ҳамда фарзандлари билан бирга ўзининг сўнги саёҳатини айнан мана шу кемасида амалга оширади.

1982 йилнинг ёз ойида саёҳатга отланган оила, 30 август куни Мичиган ва Канада ўртасидаги «Супериор» кўлига кириб келганида кучли шамол кўтарилиб, юксиз кеманинг сувда мувозанатини йўқотишига сабаб бўлади ҳамда ағдарилиб, денгиз қарига ғарқ бўлади.

Ушбу ҳалокат сабаб, бортда бўлган 27 киши, жумладан, Минч оиласининг барча аъзоси ҳалок бўлган. Фақатгина Гарри Стюарт исмли ғилдирак устаси омон қолади. У қутқарув қайиғининг ағдарилиб кетишига қарамай, мўъжизавий тарзда қирғоққача сузиб боришга эришган.

«У вақтлар деярли барча кемалар ёғочдан қурилган. Аммо бу кема технологик жиҳатдан ҳам ривожланган бўлган. Кема эгалари ўз вақтида жуда машҳур эдилар. Ушбу топилма, тарихни тушуниш учун ажойиб қўлланма вазифасини бажаради», дейилади мазкур тадқиқот вакили нутқида.

«Миллий океан ва атмосфера маъмурияти» маълумотларига кўра, «Супериор» кўлидаги сувнинг ўртача ҳарорати кема фалокатга учраган пайтларда, яъни август ойининг охирларида кескин совиб кетади.

Мутахассислар Титаник ҳамда янги топилган кеманинг чўкишига ягона сабаб, ҳар иккала кема бир хил турдаги пўлатдан тайёрланганини айтишмоқда. Уларнинг фикрича, бу металл кемаларнинг чўкиб кетишини тезлаштириш учун муҳим роль ўйнаган.