Yurtimizda olib borilayotgan xalqchil siyosat, ochiqlik va oshkoralik tamoyillari izchil davom etmoqda. Surxondaryo viloyatida shahar va tumanlar hokimliklari axborot xizmati rahbarlari — davlat tili boʻyicha maslahatchilarga xizmat avtomashinalari topshirildi.

Mazkur tashabbus davlat organlari faoliyatining shaffofligini taʼminlash, aholiga tezkor va ishonchli axborot yetkazish imkoniyatlarini kengaytirishga qaratilgan. Hududlarda amalga oshirilayotgan islohotlar, ijtimoiy-iqtisodiy loyihalar va murojaatlar ijrosi yuzasidan xolis maʼlumot tayyorlashda moddiy-texnik imkoniyatlar muhim ahamiyat kasb etadi.

— Endi hududlardagi jarayonlarga joyida baho berish, aholi bilan yuzma-yuz muloqot qilish va davlat organlari faoliyati haqida tezkor, aniq maʼlumot taqdim etish imkoniyatimiz yanada kengaydi, — deydi Boysun tuman hokimligi axborot xizmati rahbarlari Yunus Xoliyorov. — Yaratilayotgan sharoitlar ishimiz samaradorligini oshirib, ochiqlik va shaffoflikni amalda taʼminlashga xizmat qiladi. Eng muhimi, bu qadamlar xalq bilan yaqin muloqotni mustahkamlab, ishonch va hamjihatlikni kuchaytiradi.

Farhod ESONOV, “Xalq soʻzi”.